DILI, 29 jullu 2024 (TATOLI) – Ministru Defeza, Kontra Almirante, Donanciano Costa Gomes Pedro ‘Klamar Fuik’ deside hodi entrega karreta militár ualu no armamentu balun ba Komandu FALINTIL-Forsa Defeza Timor-Leste (F-FDTL) atu uza.
Karreta no armamentu ne’ebé Ministru Defeza Klamar Fuik entrega, simu direta husi Xefe Estadu Maiór (F-FDL), Brigadeiro Jenerál José da Costa ‘Trix’.
“Ohin ita iha oportunidade ida para entrega transporte viatura ualu no armamentu kilat ba ita-nia F-FDTL atu halo servisu. Transporte sira ne’ebé ita entrega ohin ne’e transporte tátika pesoál”, Klamar Fuik hateten iha nia intervensaun iha serimónia entega karreta militár ualu no armamentu ba Komandu F-FDTL iha Kuartel F-FDTL, Fatuhada, segunda, ohin.
Governante ne’e hateten, karreta tátika no kilat sira ne’e hola ho orsamentu 2023.
“Orsamentu ne’e ha’u la fiksa nia montante, ha’u atu dehan de’it katak transporte militár no armamentu sira ne’e ita hola ho orsamentu iha 2023 ne’ebé ita enkuadra ona iha lei programa militar”, nia adianta.
Klamar Fuik hateten, lei programasaun militár prodús husi Governu anteriór, Ministériu Defeza implementa ona tanba ne’e halo akizisaun ba viatura militár ualu no armamentu ne’ebé mak Ministériu Defeza entrega ona ba Komandu F-FDTL atu uza.
Ministru Defeza la mensiona totál kilat hirak no tipu kilat saida mak Governu entrega ba Komandu F-FDTL atu uza tanba liga ba armamentu ne’e segredu no mais kompleksu.
“Armamentu sira ne’e hotu para bele koresponde ho misaun espesífiku ne’ebé mak forsa armada”, nia hateten.
Klamar Fuik sei fó importánsia ba lei programasaun militár ne’ebé iha ona tanba husi lei ne’e, permite atu forsa armada bele dezenvolve iha nia meiu, armamentu, ekipamentu no rekursu hotu ne’ebé mak nesesáriu atu transforma husi forsa ida ne’ebé mak ki’ik operasionál, proposionál tuir konseitu estratéjiku militár ne’ebé mak define ona iha lei programa militár.
“Lei ne’e ita hahú implementa ona iha faze iha primeira, ita prevee millaun $9 hodi hola meiu transporte tátiku pesoál no armamentu sira ne’e hola husi Tailandia tuir ita-nia rekezitu operasionál. Ita mós sei hola tán meiu marítima hanesan meiu navál militár sira ba Komponente Navál atu sira bele utiliza, tuir lei programasaun militar nian”, nia informa.
Iha fatin hanesan, Xefe Estadu Maior F-FDTL, Brigadeiro Jenerál José da Costa ‘Trix’ hateten, ekipamentu sira ne’e F-FDTL sei haree no utiliza meiu sira ne’e bele kumpre misaun ne’ebé polítiku sira fó ba Forsa Armada.
“Ekipamentu sira ne’e utiliza ba F-FDTL tomak no ekipamentu sira ne’e Governu hola bazeia ba lei programasaun militár no tuir duni konseitu no prinsípiu ba dezenvolvimentu forsa armada Timor-Leste nian ne’ebé hateten neneik maibé bebeik’’, tenik.
Jornalista: Natalino Costa
Editór : Zezito Silva
