DILI, 29 jullu 2024 (TATOLI) – Ministériu Saúde (MS) liuhosi Institutu Nasionál Saúde Públiku Timor – Leste (INSPTL) hamutuk ho Organizasaun Mundiál Saúde (OMS) no Ajénsia Kooperasaun Internasionál Korea (KOICA) fasilita programa formasaun epidemolojia (Training of Trainer’s ) ba ofisiál médiku nasionál hamutuk 15 hodi prepara sira atu sai formadór iha futuru.
Prezidente Ezekutivu Institutu Nasionál Saúde Públika Timor–Leste (INSPTL), Merita Monteiro, hateten programa formasaun epidemiolojia ne’e hala’o atu prepara sira hodi bele sai formadór iha munisípiu no área rurál iha Timor–Leste iha futuru.
“Ami fasilita ToT hosi programa formasaun epidemiolojia ba pesoál médiku nasionál na’in 15 durante loron lima, hahú husi 29 jullu to’o 02 agostu 2024, ho objetivu atu prepara sira atu sai formadór iha futuru, nune’e sira bele fasilita pesoál médiku sira seluk iha munisípiu no área rurál, atu nune’e sira bele iha abilidade atu anélize no mitiga ho efetivu hodi prevene, kontrola, no responde ba surtu moras sira’,’ Merita Monteiro informa ba jornalista sira iha Hotel Novo Turismo, ohin.
Reprezentante Organizasaun Mundiál Saude iha Timor-Leste (OMS), Arvind Marthur, dehan programa formasaun epidemiolojia iha kampu iha istória naruk no orgullu kona-ba epidemiólogu kualifikadu sira atu hasoru dezafiu saúde públika ne’ebé kompleksu.
“Ha’u haksolok atu fó sai katak Timor-Leste, iha kolaborasaun ho Ministériu Saúde no INSPTL, sei lansa ninia Field Epidemology Training Program (FETP), iha tinan ne’e, entaun ami espera hafoin ToT ida-ne’e, partisipante ida-idak sei hala’o papél sentrál iha institusionalizasaun (FETP) iha Timor-Leste, liuhosi servisu nu’udar treinadór, mentór, supervizór. Ha’u enkoraja partisipante hotu atu aproveita oportunidade ida-ne’e hodi aprende, liga, no inspira malu. Mai ita koletivamente haka’as aan ba futuru ida ne’ebé Timor-Leste iha sistema vijilánsia no resposta ne’ebé forte no timoroan ida-idak iha oportunidade atu moris saudavel’’, Arvind Marthur hateten.
Iha fatin hanesan, Diretór KOICA nian iha Timor–Leste, Youn Hwa Kang, informa iha dékada liubá, KOICA observa ona dezafiu sira hanesan pandemia Covid-19, surtu ébola no surtu moras barak seluk iha mundu tomak. Foin lalais ne’e, moras rabia hada’et iha Timor-Leste, partikularmente iha munisípiu sira iha fronteira ho nasaun viziñu. Risku sira saúde públiku nian ne’e destaka ona importánsia hosi resposta sira saúde públiku nian ne’ebé lalais no efetivu. Tanba razaun ida-ne’e, papél hosi Programa Formasaun Epidemiolojia iha Kampu (FETP) mak indispensavel.
“KOICA, halo ona esforsu maka’as hodi tulun Ministériu Saúde no INSPTL hodi hametin sistema saúde iha Timor-Leste ho kolaborasaun ho OMS Timor-Leste’’, Youn Hwa Kang relata.
Nia haktuir, ToT ida-ne’e halibur profesionál husi rede globál, ofisiál Governu Ministériu Saúde INSPTL, OMS Timor-Leste, Gabinete Rejionál OMS Sudeste Aziátiku no KOICA. Maske ToT ida-ne’e prinsipál hanesan formasaun téknika ida, bele hametin nafatin parseria liuhosi plataforma ida-ne’e.
“Bainhira ita navega iha ToT, mak ita labele haluha meta, “Timoroan saudavel iha Timor-Leste saudavel” hanesan indika ona iha Planu Estratéjiku Setór Saúde Timor-Leste nian. Ita bele atinje objetivu ida-ne’e liuhosi prevensaun, kontrola no hatán ho efetivu ba surtu moras sira”, nia haforsa.
Programa Formasaun Epidemiolojia Kampu (ToT) fasilita hosi péritu Globál hosi SAFETYNET no OMS SEARO no hetan apoiu finanseiru hosi KOICA.
Jornalista : Felicidade Ximenes
Editór : Zezito Silva
