Veteranu Nova Zelándia halo filme dokumentáriu kona-bá misaun UNAMET-INTERFET iha TL
DILI, 29 jullu 2024 (TATOLI)– Veteranu na’in-15 mai husi nasaun Nova Zelándia halo hela gravasaun filme dokumentáriu kona-bá sira nia partisipasaun iha misaun The United Nations Mission in East Timor (UNAMET) no mós The International Force East Timor (INTERFET).
Ekipa ne’e iha hela Timor-Leste durante semana ida ona no foin lalais halo mós audiénsia ho Primeiru-Ministru (PM), Kay Rala Xanana Gusmão ho Ministru Prezidénsia Konsellu Ministru, Hermenegildo Augusto “Ágio” Cabral Pereira Alves, iha Gabinete Fronteira Maritima no Terrestre, Palásiu Governu, Díli hodi aprezenta sira nia objetivu prezensa iha TL.
Delegasaun ne’e lideradu hosi Prezidente Asosiasaun veteranus Nova Zelándia, Wayne Buck no Majór Jenerál, Martyn Dunne.
“Militar Nova Zelandia ne’e balun mai iha tinan 1999 ho misaun UNAMET, balun envolve iha miasaun INTERFET. Sira mai semana ida ona sira ba to’o ona Suai no fatin seluk hodi halo dokumentariu kona-ba saida mak INTERFET halo durante missun iha Timor-Leste,” Xefe Governu hateten hafoin hasorumalu ho veteranu hirak ne’e.
Líder Istóriku ne’e konsidera prezensa militár Nova Zelándia iha tempu ne’ebá nu’udár ezemplu di’ak tebtebes bá mundu, hodi dehan katak ho sira-nia partisipasaun, sira-nia intervensaun Timor Leste konsege hetan situasaun hakmatek no kalma hodi bele hahú prosesu harii Estadu.
Xanana Gusmão dehan, iha fatin barak iha mundu Peace Keeping Force (PKF) halo intervensaun besik tinan 30 ona maibé nafatin de’it no laiha pás, tanba ne’e sira nia prezensa iha Timor-Leste ne’e konsege rezolve problema hodi prepara sai rai ida ukun-an, ne’e hanesan ezemplu bo’ot ida bá mundu tomak.
Iha fatin hanesan, adjundu komandante INTERFET 1999, Majór Jenerál Martyn Dunne espresa sentimentu kontente tanba bele vizita hikas Timor-Leste hafoin tinan lubuk ida.
Durante estadia iha TL konsege vizita militár Nova Zelándia ne’ebé mate iha Tilomar-Covalima bainhira hala’o misaun INTERFET no konsege haree mudansa barak iha nasaun ne’e.
“Ha’u haree populasaun Timor-Leste kontente. Signifika progresu dezenvolvimentu la’o di’ak tebes,” nia dehan.
Durante enkontru, ko’alia mós kona-bá selebrasaun loron INTERFET nian iha fulan setembru 2024 no sei partisipa hosi veteranus Nova Zelándia.
Veteranu sira ne’e mai Timor-Leste iha loron 19 Jullu no sei fila hikas bá Nova Zelándia iha loron 28 Jullu 2024.
Jornalista: Hortencio Sanchez
Editór: Florencio Miranda Ximenes
