Deputadu CNRT husu Governu halo luan estrada hodi solusiona engarafamentu
DILI, 30 jullu 2024 (TATOLI)—Deputadu CNRT iha Parlamentu Nasionál (PN), José Virgílio, husu Governu liuhusi ministériu kompetente atu tau atensaun liuliu oinsá halo luan espasu estrada iha kapitál Dili hodi bele solusiona problema engarafamentu.
“Hakarak foti nafatin, iha Dili laran ita haree katak, engarafamentu kuaze makaas tebe. Estrada iha Dili laran seidauk haree estrada balun loké tan espasu, hodi bele oinsá engarafamentu ne’e labele akontese,” nia hato’o liuhusi intervensaun iha reuniaun plenária komisaun permanente iha PN, tersa ne’e.
Ezemplu, nia dehan, populasaun sira iha Becora, Kuluhun, Masaur bainhira ba kompra iha merkadu Taibessi problema ne’e estrada husi Kuluhun Kalifornia ne’e estrada kloot tebe-tebes.
“Sira atu ba oinsá no oinsá atu muda ema husi merkadu Becora ne’e atu ba konsentra hotu iha Taibessi. Entaun, presiza autoridade munisípiu ne’e tenke tau matan hodi haree asuntu ida estrada sira-ne’ebé mak liga ba merkadu Taibessi de’it, maibé merkadu Manleuana mós hanesan,” nia hateten.
Nia mós sujere, Governu atu kria mini merkadu ida iha Bairru Pite, tanba komunidade hela barak iha ne’eba hodi faan sasán iha estrada ibun ne’e tanba fatin mak laiha, nune’e kria mini merkadu ho modelu saida mak bele faan sasán hodi labele halo engarafamentu.
Vise Ministru ba asuntu Parlamentár, Adérito Hugo da Costa, hateten loos duni engarafamentu iha kapitál Dili hanesan iha oras dadeer, meudia no lorokraik ho tuku 19h00 kalan aas tebe-tebes.
Ba faktu ida-ne’e, iha perspetiva ekonomista sira-nia ne’e pozitivu tanba iha situasaun di’ak ba ita-nia ekonómika dezenvolve no sirkulasaun orsamentu ho di’ak, tanba ne’e mak ema iha kapasidade kompra transporte hanesan karreta no motor.
Maibé, nia dehan, negativu mak kapasidade estrada ne’ebé la sufisiente ona atu akomoda tendénsia aumenta transporte públiku iha kapitál Dili, nune’e mensajen ida-ne’e sériu tebes ba Governu liuliu ba Ministériu Obras Públika (MOP) ho Ministériu Planeamentu Investimentu Estratéjiku ne’ebé oras ne’e daudaun halo hela observasaun sériu oinsá buka solusaun ba problema engarafamentu.
“Ita espera ho mensajen ne’e, atu dezeña futuru ita-nia estrada iha kapitál Dili atu eleva kapasidade. Nune’e, Governu rejista ona iha sinál katak estrada iha kapitál Dili tenke eleva nia kapasidade, ho solusaun saida de’it ita hein Governu liuhusi ministériu rua ne’ebé temi atu aprezenta solusaun saida mak ita atu halo iha tempu badak no tempu naruk kona-ba infraestrutura estrada,” nia dehan.
Kona-ba preokupasaun kria mini merkadu ne’e, Governante ne’e sei hato’o ba ministériu kompetente atu haree.
Entretantu, antes ne’e mós iha reuniaun plenária deputadu lubun mak foti preokupasaun kona-ba engarafamentu iha kapitál Dili.
Jornalista : Nelson de Sousa
Editór : Cancio Ximenes
