FONGTIL husu Governu avalia subsidiu intervensaun foos ba populasaun
DILI, 30 jullu 2024 (TATOLI)–Diretór Ezekutivu Forum Organizasaun Naun Governamentál Timor-Leste (FONGTIL), Valentim da Costa Pinto, husu Governu tenke avalia ba subsidiu intervensaun foos ba populasaun, tanba presu foos iha merkadu kontinua sa’e.
“Membru Governu simu kna’ar tenke halo revizaun ba taxa hosi 5% mai to’o 2.5%, no subsídiu oferese ba empreza sira ba intervensaun merkadu,” Diretór Ezekutivu FONGTIL ne’e hateten, ba jornalista sira iha Caicoli.
Tuir nia, intervensaun ida-ne’e mos lala’o ho másimu no merkadu mós kontinua regula nia aan rasik, entaun foos folin kontinua sa’e no la konsege hatuun.
Ida-ne’e, nia dehan, kontinua sakrifika povu sira-ne’ebé kapasidade kompras kiik ne’ebé kontinua sofre ba movimentu merkadu ne’e.
“Ita tenke halo intervensaun ida ba iha populasaun oinsá bele salva ita-nia komunidade ho kbit kompras kiik maibé kontinua asesu ba nesesidade bázika,” nia dehan.
FONGTIL rekomenda ba Governu liuhosi Ministériu Komérsiu no Indústria hodi akompaña intervensaun merkadu, no iha tempu hanesan komesa haforsa servisu hamutuk ho grupu agrikultór sira no fó insentivu ba toos-na’in sira.
“Governu tenke fó kréditu ba grupu agrikultór sira hodi halo buat ruma iha baze, ba atividade produtivu sira hodi responde ba iha merkadu. Ida ajuda ita-nia joven sira-ne’ebé konkuli formasaun iha sentru formasaun sira hodi bele serbisu iha rani rasik,” nia hateten.
Diretór ne’e, nia hateten, subsídiu ba iha merkadu iha Governu anteriór ajuda agrikultór sira hodi investe iha área produtividade sira.
Subsídiu ba intervensaun merkadu nian iha presu $12.50 ba foos kada saku 25kg husi foos lokál no foos importasaun no kada munisípiu hetan tonelada 50.
Jornalista : Jesuína Xavier
Editór : Cancio Ximenes
