DILI, 30 jullu 2024 (TATOLI)–Diretór Ezekutivu Forum Organizasaun Naun Governamentál Timor-Leste (FONGTIL), Valentim da Costa Pinto, husu Governu no igreja katólika atu konserva fatin Tasi-Tolu nu’udar sítiu turístiku relijiozu iha futuru.
Notísia Relevante: Ekipa SEATOU hein orientasaun muda sai uma-kain 424 okupa Tasi-Tolu
Governu investe ona fatin Tasi-Tolu nu’udar preparasaun ba vizita amu Papa Francisco nian, maibé tenke konserva fatin sai fatin turizmu no serimónia boot igreja nian.
“Investimentu lubuk ida mak halo tiha ona, espera bu’t hotu la’o di’ak. Ami-nia rekomendasaun (ba Governu no igreja) mak fatin sira-ne’ebé halo tiha ona iha ne’ebá ne’e tenke asegura hanesan fatin sentru turizmu,” Diretór FONGTIL, Valentim da Costa Pinto, hateten ba jornalista sira iha Caicoli.
Tuir nia, Governu gasta ona osan millaun ba preparasaun vizita sua santidade Papa nian mai Timor-Leste, tanba ne’e mak presiza konserva fatin istóriku sai istória id aba igreja Timor-Leste.
Tanba, nia dehan, vizita Papa João Paulo II nian iha 12 outubru 1989 ne’e, konstrui uma adat sai hanesan altar antiga iha Tasi-Tolu ne’e, durante ne’e husik abandonadu.
Diretór ne’e konsidera fatin Tasi Tolu sai fatin ida ne’ebé sagradu no fatin ida ne’ebé realiza selebrasaun atividade kultu igreja nian.
“Ita la tau matan ho di’ak, se loloos ne’e fatin sagradu. Espera katak Governu iha planu kontinuasaun depoizde Papa fila, fatin ne’e asegura ba selebrasaun loron boot ka serimónia boot sira ba iha dioseze tolu (Baucau, Dili no Maliana) nian iha Timor-Leste,” nia dehan.
Governu halo konstrusaun foun ba prasa Vatikanu no altar iha Tasi-Tolu ne’e ho fundu totál millaun $1 ne’ebé aprovadu husi Konsellu Ministru hamutuk millaun $12 ba preparasaun vizita Pastorál no Estadu amu Papa Francisco nian ne’ebé sei akontese iha 09-11 fulan-setembru 2024.
Notísia Relevante: Papa Francisco sei prezide misa solene iha Tasi-Tolu iha 10 setembru
Jornalista : Jesuína Xavier
Editór : Cancio Ximenes
