DILI, 29 jullu 2024 (TATOLI)–Sekretáriu Estadu Asuntu Toponímia no Organizasaun Urbana (SEATOU), Germano Santa Brites Dias, hateten SEATOU sei hein orientasaun husi ekipa liña ministeriál sira atu muda sai komunidade uma-kain 424 ne’ebé okupa Tasi-Tolu.
Notísia Relevante: Uma-kain 424 iha Tasi-Tolu mak hetan despeju administrativu iha fulan ne’e
Governu diskute hela asuntu entre liña ministeriál hodi bele halo despeju administrativu ba komunidade ne’ebé hela besik lagoa Tasi-Tolu no hela besik fatin konstrusaun altar foun ba selebrasaun misa solene iha vizita sua santidade Papa Francisco nian iha Timor-Leste.
“Ita agora prepara hela, hadi’a uluk situasaun ida-ne’ebé ita seidauk notifika. Notifikasaun verbal ne’ebé ita halo iha fulan hirak liuba ne’e, agora tama hela iha diskusaun ho liña ministerial sira. Hafoin ne’e, ita halo despeju administrativu,” Sekretáriu Estadu Asuntu Toponímia no Organizasaun Urbana (SEATOU), Germano Santa Brites Dias, hateten ba jornalista sira iha Tasi-Tolu, segunda ne’e.
Ekipa konjunta ne’ebé kompostu husi SEATOU, Polísia Nasionál Timor-Leste no jestaun merkadu munisipiu Dili mós presiza hetan orientasaun atu bele muda sai populasaun ka halo despeju administrativu iha área Tasi-Tolu.
Tuir nia, ekipa tenke hamamuk terrenu ne’ebá no fatin iha tasi ibun, tanba Governu hakarak prepara fatin Tasi-Tolu ne’e di’ak ba ema hotu liuliu ba timoroan no ema estranjeiru sira bele vizita fatin ne’e, ne’ebé sai fatin turístiku ba ema hotu.
“Seidauk hatene loloos, tanba ha’u mos hein hela orientasaun, depois mak ita halo serbisu. SEATOU ho ekipa serbisu tuir desizaun no orientasaun liña ministeriál nian tuir lei. Entaun, ita ezekuta de’it,” nia dehan.
Tuir nia, seidauk iha data loloos atu halo despeju administrativu maibé durante ne’e Governu husu ona okupante Tasi-Tolu atu hamamuk fatin hahú husi 11-15 jullu 2024, maibé to’o oras ne’e Governu seidauk realiza desizaun ne’e.
Notísia Relevante: Governu husu komunidade okupa Tasi-Tolu hamamuk fatin hahú 11-15 jullu
Jornalista : Jesuína Xavier
Editór : Cancio Ximenes
