DILI, 02 Jullu 2024 (TATOLI) – Sekretáriu Estadu Asuntu Toponímia no Organizasaun Urbana, Germano Santa Brites Dias, informa katak dadus ikus ne’ebé Ministériu Obra Públika (MOP) aprezenta uma-kain 424 iha Tasi-Tolu mak sei hetan despeju administrativu iha Jullu ne’e.
Sekretáriu Estadu ne’e dehan, antes ne’e, Governu fó hatene ona ba komunidade atu sai husi fatin ne’e iha Juñu, maibé tanba parte MOP halo tan verifikasaun dadus ba vítima sira, entaun tenke muda fali mai iha Jullu.
“Dadus ikus ne’ebé MOP relata ba ita, komunidade ne’ebé okupa iha área protejida Tasi-Tolu hamutuk 424, ne’ebé iha tempu badak ita sei halo normalizasaun”, Germano Brites Dias hateten ba Tatoli, iha aldeia Terra Santa, Dili.
Nia dehan, husi dadus família 424 ne’e, ekipa sei foku uluk ba abitante ne’ebé hela besik bandeira riin antigu nian no sira ne’ebé besik palku altar santu ne’ebé daudaun konstrui hela.
Notisia relatóriu : https://tatoli.tl/2024/05/03/dialogu-ho-komunidade-tasi-tolu-seatou-fo-biban-hamamuk-fatin-iha-maiu-nia-laran/
Nune’e, governante ne’e husu ba uma-kain sira ne’ebé okupa iha área protejida Tasi-Tolu tenke prepara aan sai, tanba desizaun foti hotu ona liuhusi diálogu sira ne’ebé halo ona antes.
“Ha’u husu ba maluk sira ne’ebé daudaun sei hela iha Tasi-Tolu tenke prepara aan tanba iha fulan ne’e nia-laran ekipa sei halo despeju administrativu, nune’e kompañia bele hahú ona halo sira-nia serbisu”, nia apela.
Notisia relavante : https://tatoli.tl/2024/05/28/ekipa-seatou-sei-tun-normaliza-lagoa-tasi-tolu-iha-meadu-junu/
Jornalista: Arminda Fonseca
Editora: Maria Auxiliadora
