HEADLINE, KAPITÁL

Ekipa SEATOU sei tun normaliza lagoa Tasi-tolu iha meadu juñu

Ekipa SEATOU sei tun normaliza lagoa Tasi-tolu iha meadu juñu

Sekretáriu Estadu Asuntu Toponímia no Organizasaun Urbana, Germano Santa Brites Dias. Imajen Tatoli/António Daciparu

DILI, 28 maiu 2024 (TATOLI)—Ekipa konjunta ne’ebé lidera husi Sekretaria Estadu Asuntu Toponímia no Organizasaun Urnaba (SEATOU) iha fulan-oin sei organiza uma-kain iha lagoa Tasi-tolu, hahú husi tasi I,II no III ne’ebé antes ne’e simu ona notifikasaun atu hetan despeju administrativu.

“Inísiu juñu ita seidauk book tanba agora ita elabora hela dadus ne’ebé rekolla iha terrenu hamutuk 300 no sei entrega ba Ministériu Obra Públika (MOP) hodi haree verifika loos hotu ona, ita fó avizu atu sira muda rasik sira-nia sasán no meadu juñu ita hahú book ona, tanba fatin ne’e prepara duni ba vizita Amu Papa,” Sekretáriu Estadu Asuntu Toponímia no Organizasaun Urbana, Germano Santa Brites Dias, informa iha Universidade da Paz (UNPAZ) nia kotuk, hafoin halo operasaun ba animál fahi, tersa ne’e.

Norisia relevante : SEATOU lidera ekipa halo levantamentu dadus ba komunidade iha lagoa Tasi-tolu

Nia dehan, tuir loloos normalizasaun ne’e atu halo iha inísiu juñu, maibé tanba ekipa halo hela verifikasaun dadus maka tenke muda fali ba meadu juñu.

“Nune’e, husu ba komunidade ne’ebé hetan ona notifikasaun atu koopera ho Governu, hamamuk fatin, nune’e to’o ekipa tun laiha tan diskusaun, tanba diálogu no levantamentu dadus halo hotu ona,” nia reforsa.

Antes ne’e, iha loron 03 maiu 2024, ekipa konjunta ne’ebé lidera husi SEATOU halo diálogu ho komunidade iha Tasi-tolu, durante oras rua resin nia laran, relasiona ho desizaun halo despeju administrativu iha fatin ne’ebé konsideradu protejidu no istóriku.

Diálogu ne’e partisipa husi reprezentante liña ministeriál, Autoridade Seguransa no Defeza, Autoridade Protesaun Sivil, Administradór postu iha munisípiu Dili, Autoridade lokál, Veteranu, Sosiedade Sivil, inklui komunidade sira iha área Tasi 1-3 no besik Tasi-ibun Tasi-tolu.

Jornalista      : Arminda Fonseca

Editora           : Julia Chatarina

iklan
iklan

Leave a Reply

iklan
error: Content is protected !!