DILI, 11 jullu 2024 (TATOLI)–Governu liuhusi Ekipa Jestaun Merkadu no Turizmu iha Autoridade Munisipiu Dili (AMD) fó sai avizu no husu komunidade ne’ebé okupa rai Estadu besik lagoa no fatin konstrusaun altar ba misa solene iha Tasi-Tolu, atu hamamuk fatin hahú ohin (kinta, 11 jullu) to’o segunda (15 jullu) semana oin.
Notísia Relevante: Uma-kain 424 iha Tasi-Tolu mak hetan despeju administrativu iha fulan ne’e
Xefe Departamentu Jestaun Merkadu iha AMD, Joaquim Bragança Matos Belo, hateten sira simu orientasaun husi Sekretária Estadu Asuntu Toponímia no Organizasaun Urbana (SEATOU) hodi fó avizu ba populasaun iha Tasi-Tolu atu hamamuk fatin.
“Ekipa SEATOU no jestaun merkadu ohin ba avizu ona populasaun sira hela iha ai-rrin bandeira tuan to’o besik konstrusaun altar nian ne’e, komesa ohin to’o segunda tenke hamamuk fatin,” Xefe Departamentu Jestaun Merkadu, Joaquim Bragança Matos Belo, hateten ba jornalista sira iha Tasi-Tolu, kinta ne’e.
Iha fatin hanesan, ekipa AMD mós fó avizu mós ba vendedór karreta no motor atu labele faan iha Tasi-Tolu, no aviza ba vendedór sira husi Tasi-Tolu to’o rotunda Comoro, ponte foun Comoro no Elemloi atu labele faan iha orotoar leten.
Iha biban ne’e, ekipa ne’e hadau vendedor sira-ne’ebé lakohi halo tuir avizu no hadau roupa obralan no modo-tahan sira faan iha dalan ninin.
Moradora Rosália Conceição hateten, ekipa husi Ministériu Obra Públika fó sai ona avizu katak atu sira bele sai husi fatin ne’ebá.
“Iha 18 maiu, ekipa husi Ministériu Obra Públika mai fó avizu ona atu ami muda sai, maibé ami-nia oan sira eskola. Oinsá ami sai, se mai avizu derrepente de’it atu sai iha loron tolu nia laran,” Rosália Conceição hateten ba Agência Tatoli, iha Tasi-Tolu, kinta ne’e.
Moradora ne’e mós hateten, ekipa husi SEATOU ba tau ona markasaun ba sira-nia uma hodi bele hamamuk fatin ne’e muda ba fatin seluk.
Tuir dadus husi SEATOU, Governu sei halo despezu administrativo ba populasaun iha Tasi-Tolu hamutuk uma kain 424.
Notísia Relevante: SEATOU lidera ekipa halo levantamentu dadus ba komunidade iha lagoa Tasi-tolu
Jornalista : Jesuína Xavier
Editór : Cancio Ximenes
