Família husu Governu integra istória Sebastião Gomes nia luta iha kurríkulu nasionál
DILI, 27 Otubru 2026 (TATOLI)—Família husu Governu liu husi Ministériu Edukasaun atu integra istória Saudozu Sebastião Gomes nia luta iha kurríkulu nasionál, atu nune’e joven no estudante sira bele kontinua koñese tanba durante sira haree ema-ne’e ladún partisipa sira ukun an naran sira iha ezame nasionál.
Notísia Relevante: Sebastião “Loriku Rai Na’in” La Fó Fatin Ba “Garuda”
“Primeiru fó valorizasaun bá iha Saudozo Sebastião Gomes, liuliu estudante sira tanba dalaruma ami mós triste. Bainhira iha kurríkulu Sekundária iha ezame sira-ne’e sempre mosu ema-ne’ebé mak la luta ba rai ida-ne’e, mai sai fali iha ezame. Nusa ita la tau Sebastião Gomes iha ezame nasionál ne’e mak ami triste,” Reprezentante Familia Saudozu Sebastião Gomes, Moisés Rangel, hateten ba Jornalista sira iha rezidénsia Vila Verde, ohin.
Nia esplika família mós kontente tanba Estadu hanoin ona muda nian rate mai ne’e familia kontente tebes.
“Tanba durante ne’e, aban nia mate halo tinan 35 maibé iha tinan 10 ami la konta maibé konta ba tinan 25 ne’e. Komesa husi ita ukun an mai ne’e, vizita nia rate ne’e menus liu, tinan-tinan menus. Ne’e mak ami haree hanesan Estadu hanoin di’ak para valoriza nia tanba de’it ho razaun barak loos iha Santa Cruz ne’e, Estadu muda nia rate mai oin ne’e, ami agradese tebes,” nia dehan.
Iha fatin hanesan, Presidente Komité 12 Novembru, Grigório Saldanha, afirma istória hotu-hotu tenke hatama iha kurríkulu nasionál hotu.
“Ita-nia istória tama iha kurríkulu, ita-nia istória hahú to’o mai iha remata ne’e tama ona iha istória estadu no nasaun nian, para ita nia joven sira bele hatene, maibé too agora seidauk ida ne’e la signifika buat hotu-hotu ona, maibé prosesu la’o hela tanba iha oitavu governu mós harii komité 25, tau hakerek ita nia istória,”dehan Presidente Komité 12 Novembru Grigório Saldanha.
Nia dehan iha tinan kotuk Primeiru Ministru husu atu komité 12 Novembru atu hakerek mós nia istória.
“Iha tinan kotuk, ita-nia Maun Boot Xanana mós husu Komité 12 Novembru atu hakerek mós istória. Se komité hakerek istória, konserteza nia hakerek ketak, tenke iha kobertura ka kobre mós Sebastião Gomes nia prosesu antes nia to’o nia mate. Tanba luta sira-ne’e la keta-ketak, luta sira-ne’e iha ligasaun ba maluk,”nia dehan.
Nia informa, uluk ema barak mak hela iha hotu Motael tanba funu no presegisau sira-ne’e tanba funu hahú husi 1974 no 1975.
“Komún prinsipiu ukun rasik ba Timor-Leste, mate ka moris ukun rasik an, prinsipiu independénsia ida mak inspira ita mai to’o iha 1999. Se ita hakerek istória 12 Novembru, liga mós istória sira-ne’ebé mak antes ne’e iha tinan ona, ne’ebé komité 12 Novembru sei hakerek hotu. Ne’ebé tempu ne’e la’o, maibé importante mak ita l bele hein osan iha mak ita foin servisu, servisu dadaun ona. Ita nafatin buka osan depois istória mós ita nafatin hakerek, mabé ba komité ita hahú hakerek ona,” nia esplika.
Tanba ne’e, Komité 12 Novembru husu ba Ministériu Edukasaun atu bele haree asuntu ida-ne’e, tanba ne’e kompétinsia husi Ministériu Edukasaun nian.
“Ha’u atu rekomenda no responsabilidade Ministériu Edukasaun atu hakerek asuntu ida-ne’e tanba kompetente ne’e Ministériu Edukasaun hakerek ita-nia istória maibé ita mós bele hakerek. Ema ida-idak bele hakerek nia istória, pur istória sira ne’e ita tau hamutuk fila-fali hodi haree nia kontínuidade ne’e hahú husi ne’ebé to’o iha ne’ebé. Purké, ida-ne’e obrigasaun ema hotu-hotu nian,” nia hateten.
Notísia Relevante: MAKLN sujere muda saudozu Sebastião Gomes nia rate ba portaun oin
Jornalista : Felicidade Ximenes
Editór : Cancio Ximenes
