DILI, 24 juñu 2024 (TATOLI)–Vise Koordenadór ba Vizita Papa hosi Igreja no atuál Pároku Igreja Santo António Motael, Pe. Guilhermino da Silva, hateten data fixa ba misa solene ne’ebé Papa Francisco prezide iha Tasi-Tolu ne’e, realiza iha tersa (10 setembru 2024) iha tuku 116h00 lorokraik.
Notísia Relevante: Marco Sprizzi: Konstrusaun altar santu iha Tasi-Tolu sei hela hanesan muzeu
Nai-lulik ne’e esplika, misa solene ne’e sei realiza iha lorokraik tanba klima manas iha Timor-Leste ne’ebé lakontribui di’ak ba saúde Papa nian, tanba Papa mós ho kpondisaun la’o hela ho kadeira roda entaun tenke oras lejivel ba selebrasaun ne’e
“Iha loron 10 setembru, tanba ne’e mak buat hotu-hotu, misa iha Tasi-Tolu oras ida ho balun de’it. Labele liu ida-ne’e, tanba rai manas,” Vise Koordenadór ba Vizita Papa hosi Igreja no atual Pároku Igreja Motael ne’e hateten ba Agência Tatoli, iha Motael.
Klima Timor-leste ne’e manas, nai dehan,, tanba ne’e mak oras misa nian ne’e deside ba parte lorokraik, atu ne’e ema labele sente rai nia manas iha selebrasaun misa solene ne’e.
Tanba, tuir nian, Papa Francisco nia vizita pastorál ne’e sai husi Roma ba vizita uluk Jakarta-Indonézia no Papua Nova Guine, molok mai vizita Timor-Leste.
Fatin sira-ne´ebé Papa Francisco sei vizita durante ninia vizita pastoral iha Timor-Leste ne´e mak hanesan fatin Nunsiu Apostóliku iha Motael nu´udar rezidénsia ba Papa Francisco atu hela. Durante nia vizita ne´e
Papa Francisco sei vizita igreja Katedrál Imaculada da Conceição Dili ne´ebé sei utiliza hanesan fatin atu halo sorumutu ho padre no madre sira iha Timor-Leste, hahú hosi bispu, padre, madre no selu-seluk tan.
Nune’e mós Papa Francisco sei vizita Sentru Konvensaun Dili (CCD) hanesan fatin ba sorumutu entre Papa Francisco ho juventude Katólika iha territóriu nasionál, no sei vizita fatin istóriku Tasi-Tolu ne’ebé hili sai fatin atu atu selebra misa solene antes Papa Francisco husik hela Timor-Leste.
Vizita Papa Francisco ida-ne´e nu’udar vizita Estadu dahuluk Papa Francisco mai Timor-Leste hafoin Timor-Leste restaura independénsia iha Tasi-Tolu, 20 maiu 2002, no hanesan vizita daruak hafoin Papa João Paulo II vizita Timor-Leste iha okupasaun Indonézia iha 12 outubru 1989.
Papa Francisco vizita nasaun 4 iha Asia no Oseania
Tuir portál ofisial Vatican News haktuir, Papa Francisco sei hala’ o nia vizita pastorál iha Indonézia, Papua Novaguine, Timor-Leste no Singapura iha 2-13 September 2024.
Notísia Relevante: Membru koru 1.100 partisipa misa solene Papa Francisco prezide iha Tasi-tolu
Papa Francisco simu konvite hosi Xefe Estadu no autoridade Igreja atu hala’o vizita pastorál ba da-43 ba estranjeiru. Tuir oráriu, Papa Francisvo sei vou hosi Roma iha 02 setembru no sei fila-fali ba Roma iha 13 setembru 2024.
Santu Padre sei hala’ o nia viajen dahuluk ba Jakarta-Indonézia, iha 03 setembru 2024 no iha Jakarta to’ o 06 setembru 2024. Populasaun Indonézia maiória Musulmanu ne´ebé boot iha mundu no Katólika kuaze populasaun juta ualu (8) ka ekivalente 3,1%
Hafoin ne´e, Papa Francisco sei hala’o vizita pastorál ba Port Moresby, Papua Novaguine no Vanimo iha 06-09 setembru 2024. Populasaun iha Papua Novaguine 32% sarani Katólika ka kuaze ema hamutuk juta rua.
Husi ne´eba, Papa Francisco sei vizita Dili-Timor-Leste durante loron tolu ne´ebe sei hahú hosi iha 09-11 setembru 2024. Timor-Leste maiória relijiaun Katólika ho populasaun 96% ka ema hamutuk juta ida.
Hafoin ne´e, Papa Francisco sei vizita Singapura durante loron tolu hahú hosi 11-13 september 2024. Maizumenus iha sarani Katólika hamutuk 395.000 ne´ebé hela iha Singapura ne´e reprezenta kuaze populasaun 3%.
Entretantu, Papa Francisco halo vizita pastorál mai Timor-Leste ne´e sei akompaña husi bispu no kardeál hamutuk 55 no jornalista internasionál hamutuk ema na’in-85.
Notísia Relevante: Papa Francisco sei vizita Timor-Leste iha 09-11 setembru 2024
Jornalista : Jesuína Xavier
Editór : Cancio Ximenes
