SOSIEDADE SIVĺL

Marco Sprizzi: Konstrusaun altar santu iha Tasi-Tolu sei hela hanesan muzeu

Marco Sprizzi: Konstrusaun altar santu iha Tasi-Tolu sei hela hanesan muzeu

Progresu konstrusaun altar, iha Tasi-tolu, Dili, kuarta (6 maiu 2024). Imajen Tatoli/António Daciparu

DILI, 17 maiu 2024 (TATOLI)–Reprezentante Vatikanu iha Timor-Leste, Núnsiu Apostóliku, Monseñor Marco Sprizzi, hateten konstrusaun altar santu ba vizita Papa Francisco ne´ebé konstrui iha Tasi-Tolu sei husik hela hanesan muzeu ba timóroan no turista sira.

Monseñor hateten, konstrusaun palku boot iha Tasi-Tolu bele sai permanente ne’e, hafoin liutiha Papa Francisco nia vizita ne´e, iha loron boot ka loron nasionál ruma sei bele utiliza ba atividade sira seluk.

“Ho investimentu hotu-hotu ho okaziaun ba vizita Papa Francisco nian, Governu halo ba dezenvolvimentu de Timor enjerál. Kritika hotu-hotu la fó konta katak buat hotu sei hela ba timoroan, la’ós provizória,” Monseñor Marco Sprizzi hateten ba jornalista sira iha serimónia inaugurasaun Sede Konferénsia Episkopál Timorense (CET, sigla portugés) iha Bidau.

Dezeñu ba konstrusaun Altar Misa Sua Santidade Papa Francisco, iha Tasi-tolu, Dili, kuarta (17 abríl 2024). Imajen Tatoli/Antonio Daciparu

Tuir nia, obra fízika husi Governu hanesan reabilita igreja, estrada no sítiu turizmu relijioza Cristo Rei, ba preparasaun simu Papa Francisco nia vizita iha Timor-Leste ne´e sei hela permanente ba povu Timor-Leste.

“Ida-ne’e mak sei hela ba povu Timor-Leste. Ezemplu mak hadi’a estrada, reabilita katedrál no Cristo Rei. Ida-ne’e investimentu ida ba iha turizmu no ba populasaun, tanba ema barak katólika ba atividade kultu,” Monseñor Marco Sprizzi hateten ba jornalista sira iha serimónia inaugurasaun Sede Konferénsia Episkopál Timorense (CET, sigla portugés) iha Bidau.

Governu liuhosi Konsellu Ministru aprova orsamentu $12 millaun ba preparasaun obra fízika hanesan reabilitasaun estrada, konstrusaun Altar ba misa Amu Papa nian iha Tasi-Tolu, Katedrál Dili, igreja Motael, Sentru Konvensaun Dili no sítiu istóriku no fatin turizmu relijioza Cristo Rei, Fatucama. Dili.

Notísia Relevante: Empreza Karya Timor sei finaliza konstrusaun altar misa Amu Papa durante fulan-haat

Jornalista : Jesuína Xavier

Editór        : Cancio Ximenes

iklan
iklan

Leave a Reply

iklan
error: Content is protected !!