DILI, 30 abril 2024 (TATOLI)–Vise Kordenadór ba preparasaun vizita Papa nian hosi igreja no atuál Pároku Igreja Sabto Antonio Motael, Guilhermino da Silva, hateten membru koru husi dioseze tolu iha Timor-Leste hamutuk 1.100 mak sei partisipa iha misa solene ne´ebé Papa Francisco prezide iha Tasi-tolu.
Notísia Relevante: Papa Francisco sei vizita Timor-Leste iha 09-11 setembru 2024
Nia hateten, parte komisaun organizadora iha Timor-Leste fó oportunidade ba kada dioseze hodi hili sira-nia membru koru, nune´e bele tuir insaiu hamutuk no bele kria sai grupu korál ida.
“Koru iha membru 1.100 ida-ne’e sei kompostu hosi dioseze Baucau, Dili no Maliana. Membru koru hosi Dioseze Baucau sei hili ema ema 200 no Dioseze Malian mós hili ema 200. Dioseze Dili mak sei hili membru koru hamtuk 700-resin,” Pároku Igreja Motael, Guilhermino da Silva, hateten ba Agència Tatoli iha nia rezidensia Motael, tersa ne e.
Kona-bá múzika, nia dehan, múzika sira-ne’e sei fahe ba dioseze no tuir grupu ne’ebé mak sira hili ona, hafoin sira treinu iha ne’ebá no Dili mos treinu iha Dili, no to’o iha tempu ida sira mai antes semana ida ka loron rua ka tolu iha Dili, sira ensaiu hamtuk no hadi’a hamutuk buat ne’ebé ladi’ak.
Tuir nia, liturjia sira-ne’e konserteza komisaun liuliu seksaun ba múzika no liturjia ba misa solene nian ne´e preparadu hotu ona no hein de’it atu treinu.
“Bu’at ida kapaas mak ne’e. Ha’u dehan kapaas tanba, mezmuké ita halo selesaun ba múzika sira no liturjia ba selebra oinsa ne’e la’os ita mak deside mesak, testu no sistema serbisu no liturjia misa nian hotu ita haruka hotu ba Roma. Komisaun no delegasaun iha Roma konkorda ona mak ita foin ezekuta mak ita foin kanta,” nia dehan.
Múzika sira iha lian tetun hotu, tanba Igreja presiza ne’e sarani sira mós bele hatene no kanta tuir iha misa solene ne’e, la’ós múzika foun maibé múzika baibain sira-ne’ebé sarani sira hatene kanta.
“Ida-ne’e mak importante, tanba la’ós dehan Papa mai, bu’at hotu iha lian estranjeira, lae,” nia hateten.
Husu kona-ba ema ne’ebé atu lee leitura, nia hatán, ida-ne’e la’ós bu’at ida defísil liu maibé orsida bele haree iha divizaun tarefa ne’e, primeira leitura dioseze ida, segunda leitura dioseze ida no orasaun dos fieis dioseze ida mak toma konta.
“Buat kiik-oan sira-ne´e ita presiza halo. Agora, ami seidauk bele ko´alia kona-ba ida-ne´e,” nia dehan.
Nia dehan, dekorasaun sira-ne´e atu enfeita ka orna iha altar misa solene iha Tasi-tolu nian ne´e, tau iha planu orsamentu maibé sei hein nia konfirmasaun husi Roma.
“Hirak ne’e hotu tau hotu ona iha planu orsamentu. Sé mak oferese ai-funan, sé mak ba enfeita, maibé uluk liu seksaun ida halo planu enfeita oinsá depois sei haruka ba iha Roma no Roma konkorda enfeita ho modelu ida-ne’e mak sira iha ne’e foin bele ezekuta,” Amu ne´e hateten.
Maske ekipa komisaun organizadora iha Timor-Leste prepara planu, maibé presiza iha konfirmasaun hosi Vatikanu.
“Ita mak prepara ita mak komisaun, maibé ita lahalo bu’at sira-ne’e mesak. Ita iha koordenasaun no konsulta ho Roma. Tanba ne’e mak loro-loron seksaun sira tenke hatama planu atu nunsiatura kontaktu nafatin ho Vatikanu,” nia dehan.
Notísia Relevante: IgrejaTimor hili tema “A vossa fé seja a vossa Cultura” durante vizita Amu Papa
Jornalista : Jesuína Xavier
Editór : Cancio Ximenes
