HNGV prepara espasu ba VIP, karik presiza asisténsia, iha ámbitu vizita Amu Papa
DILI, 30 jullu 2024 (TATOLI) – Diretora Administrasaun Finansa no Lojístika iha Hospital Nasionál Guido Valadares (HNGV), Sara Maria, hateten ospitál hahú prepara espasu administrasaun tuan, liuhosi reabilita, atu fó atendimentu ba Very Important Person (VIP), karik presiza asisténsia, iha ámbitu vizita Amu Papa.
‘’Ekipa hosi Roma mai vizita mai vizita iha fulan kotuk, haree dezeñu ne’ebé aprezenta no sira konkorda ida-ne’e ho nia reabilitasaun fulan rua tenke remata ona, atualmente atinje ona 6%, atu bele iha kondisaun hodi atende ba VIP sira, karik presiza asistensia ba saúde, entaun espasu ida-ne’e espesialmente ba vizita Amu Papa nian, atu labele afeta ba funsionamentu atendimentu loroloron nian’’, Sara haktuir iha HNGV, ohin.
Sara informa, empreza tenke aselera projetu ne’e tanb tempu la’o daudaun ona, espera iha final agusto, obra ne’e bele entraga ona no bele priénse ekipamentu médiku atu utiliza ba vizita Amu Papa nian.
“Depois remata vizita Amu Papa maka, ita foin uza fali ba emerjénsia pediatria nian, atu pasiente pediatria ne’ebé mak baixa iha emerjénsia ita sei fahe adultu ketak no pediatria ketak”, nia esplika.
Nia relata, empreza ne’ebé mak kaer projetu reabilitasaun ba administrasaun tuan HNGV mak Empreza Nasionál Caeklin.
“Kona-ba orsamentu ida-ne’e mai hosi Ministériu Saúde ne’ebé asesu ba fundu infraestutura tanba prosesu aprovizionamentu ne’e hosi Ministériu Saúde ne’ebé envolve mós Ministériu Obras Públika no ADN’’, nia afirma.
Iha sorin seluk, Diretór Servisu Apoiu Diagnóstiku no Therapeútika iha HNGV, Vidal de Jesus Lopes, hateten aleinde reabilitasaun ba administrasaun tuan, HNGV hodi prepara ona kapasitasaun, oinsá atu halo primeiru sokoru, tanba iha vizita Amu Papa nian, ema sei nakonu iha Dili, entaun preparasaun ba antesipasaun ba senáriu saida mak mosu HNGV, iha ona rekursu no sei koloka tuir idaidak nia área no kapasidade ba espesialiddade nian iha oteis no mós fatin públiku sira.
Jornalista : Felicidade Ximenes
Editór : Zezito Silva
