Konstrusaun Pediatria andar lima no ICCU HNGV Atinje 34%
DILI, 30 jullu 2024 (TATOLI) – Diretora Administrasaun Finansa no Lojístika HNGV, Sara Maria, hateten konstrusaun edifísiu pediatria andar lima no Unidade Kuidadu Intensivu Kardiolojia (ICCU) iha Hospitál Nasional Guidu Valadares (HNGV) atinje ona 34%.
“To’o agora, konstrusaun ba pediatria andar lima no ICCU iha HNGV atinje ona 34%”, Sara dehan iha nia fatin HNGV, ohin.
Rekorda fali katak konstrusaun pediatria andar lima no ICCU iha HNGV tau orsamentu ho montante millaun $9.3 no konstrusaun refere ho durasaun tinan rua, hahú 2023-2025. Projetu ne’e kaer husi Empreza China Civil Engineer Constrution Cooperation (CCECC).
Antes ne’e, Diretór Empreza China Civil Engineer Contruction Cooperation (CCECC), Liang Quing komprometidu katak sei konklui projetu ida-ne’e ho infraestrutura ne’ebé kualidade ba Governu no povu Timor-Leste.
Nune’e mós, Primeiru-Ministru (PM), Kay Rala Xanana Gusmão, halo ona vizita traballu ba HNGV, iha segunda, fulan-Maiu 2024, hodi haree direta konstrusaun pediatria andar lima no ICCU ne’ebé oras ne’e iha hela prosesu konstrusaun.
“Ha’u mai haree fatin ida ne’ebé Xina hakarak kontribui hodi harii ospitál pediatria nian, depois ida-ne’e, sei lori tinan ida ka tinan ida ho balun, tinan rua karik, tanba boot ho andar lima”, hatete Xanana afirma.
Edifísiu ho andar lima ne’e konstrui hosi Empreza China Civil Engineering Construction Coorporation no medida rai ho luan 4.300 m², sei kompleta ho kama hamutuk 327.
Jornalista : Felicid ade Ximenes
Editór : Zezito Silva
