MOP Viqueque planu normaliza estrada ne’ebé kotu iha Uatulari
DILI, 30 jullu 2024 (TATOLI)- Diretór Servisu Obra Publika Munisipál Viqueque, Casildo Gomes Soares, hateten koordena ona Institutu Gestaun Ekipamentu Apoia Dezenvolvimentu Infraestutura Timor-Leste (IGEADI-TL) atu halo normalizasaun ba estrada ne’ebé ameasadu kotu iha área suku Uma-Uain Kraik, postu Viqueque Vila munisípiu Viqueque bá postu Uatulari tanba kauza husi udan-boot iha loron 26 Jullu.
“Dalan ne’ebé besik kotu ne’e, ami tau ona atensaun hodi halo normaliza. ita-nia enjiñeriu sira ba haree ona estrada mota Le’e halo identifikasaun hodi koordena ho IGEADI-TL hodi halo normaliza, atu labele difikulta movimentu transporte públiku ba postu Uatulari no Uatucarbau mai iha munisípiu Viqueque”,Diretór ne’e hateten ba jornalista Agência Tatoli, via telefónika, ohin.
Enjiñeru sira bá haree tiha estrada mota le’e, hodi koordena ho parte IGEADI-TL hodi halo normaliza tanba ekipamentu pezadu sei halo hela servisu iha munisípiu Viqueque.
Daudaun, ekipa IGEADI halo normaliza estrada husi parte suku Afaloikai, Babulu iha Uatulari antiga ne’ebé aat sira-ne’e bainhira hotu kontinua halo normaliza mota Luga-Asa iha suku Uma Uain Leten.
“Iha parte Luga Asa ne’e mota maka amesa ba komunidade sira-nia uma, nune’e IGEADI sei halo normaliza. Depois normaliza hotu mota Luga-Asa, maka hadi’a fali estrada mota le’e nian”, nia afirma.
Iha fatin ketak, Motorista iha Uatulari bá Viqueque, Lorenço da Silva, hateten, estrada parte mota le’e difikulta tebes sira nia movimentu hodi lori produtu ba Viqueque Vila.
“Nune’e, ami husu presiza normaliza lalais, atu labele difikulta ba movimentu sira tanba estrada ne’e uniku no laiha alternativu ruma, nune’e kotu entaun movimentu husi Viqueque bá Uatulari labele no husi Uatulari tun ba Viqueque mós labele”. Tenik nia.
Jornalista: Vitorino Lopes da Costa
Editór : Florencio Miranda Ximenes
