OJE 2024 : HNGV ezekuta ona 57% hosi janeiru to’o jullu
DILI, 30 jullu 2024 (TATOLI) – Diretora Administrasaun Finansa no Lojístika iha Hospitál Nasionál Guido Valadares (HNGV), Sara Maria, hateten ezekusaun Orsamentu Jerál Estadu (OJE) 2024, dezde janeiru, atinje ona 57% ne’ebé ekivalente ho $5,890,024.53.
Orsamenu tinan fiskál 2024, alokadu ba Hospitál Nasionál Guido Valadares (HNGV), hamutuk $13,561,728.00 ne’ebé fahe ba kategoria saláriu no vensimentu $8,106,499.00, bens servisu $4,341,366.00, kapitál menór $613,647.00 no kapitál dezenvolvimentu $500,216.00.
“Hosi janeiru to’o loron 23 jullu ita ezekuta ona hamutuk 57% inklui ho komitmentu no obligasaun”, Sara Maria, informa iha nia fatin, ohin.
Nia esplika, hosi totál ezekusaun, $5,890,024.53,ida-ne’e, barak liu gasta ba saláriu no vensimentu hamutuk $4,866,771.73, bens servisu $ 852,317.75, kapitál menór $170,935.05 no kapitál dezenvolvimentu. HNGV foin iha komitmentu inklui obligasaun atu halo pagamentu ba projetu ne’ebé mak remata ona.
“Iha obligasaun ne’e, ita komesa atu halo ona pagamentu ba projetu sira ne’ebé mak remata ona, tanba invoice ne’ebé mak tama, ita presiza atu halo pagamentu ezemplu projetu sira hanesan inspesaun sala operasaun foin remata ida-ne’e, ita tenke halo pagamentu, inklui ita halo pagamentu ba manutensaun ba ita-nia mákina hemodialize, raiu-x no mákina CT-Scan radiolojia nian”, nia konklui.
Jornalista : Felicidade Ximenes
Editór : Zezito Silva
