DILI, 31 jullu 2024 (TATOLI) – Diresaun Nasionál Farmasia no Produtu Médiku (DNFPM) hamutuk ho parseiru Department for Foreign Affairs no and Trade (DFAT) no Instituto Nasionál Farmasia Produtu Médiku (INFPM) reune hodi koordena, utiliza sistema Supplay hodi kontrola estoke ai-moruk iha Timor-Leste (TL).
“Enkontru ida ohin ne’e hanesan enkontru koordenasaun atu haree ba preparasaun utilizasaun mSupplay ne’ebé durante ne’e, ita hetan apoiu hosi DFTA ho PHD hosi Austrália, entaun oinsá ita atu tau orsamentu ba tinan 2025, hodi prepara no diskute finansiamentu ba apoiu sistema mSupplay ida-ne’e ba oin”, Diretór Nasionál Farmasia no Produtu Médiku (DNFPM), Delfim Fereira, informa ba jornalista sira iha INFPM Kampu Alor, ohin.
Nia dehan, mSupplay nia funsaun mak atu fasilita informasaun ba sistema lojístika oinsá mak atu halo planu aprovizionamentu hanesan pedidu sira mai hosi postu saúde, sentru saúde, ospitál mai to’o INFPM, ne’e nia kanál ne’e oinsá atu utiliza mSupplay ida-ne’e atu kontrola estoke ai-moruk no bele deteta item ne’e hira mak sei iha, entaun sistema ne’e ajuda atu bele hatene kontrola estoke ai-moruk.
“Bainhira ita utiliza mSupplay ne’e depnde ba konesaun internet tanba ita hatene ita-nia jaringan ne’e ladún la’o di’ak, entaun ho ida-ne’e ami sei servisu hamutuk ho TIC Timor, atu fasilita internet ba to’o iha postu saúde, sentru saúde, nune’e ita-nia sistema ida-ne’e bele la’o di’ak no ajuda ita atu hatene estoke ai-moruk sira iha kada fasilidade saúde iha ita-nia rain”, nia afirma.
Nia dehan, Governu antes ne’e utiliza ona mSupplay maibé iha difikuldade balun tanba ne’e mak presiza ajusta nafatin ba oin, atu bele utiliza sistema ne’e ho di’ak liután.
“Durante ne’e ita utiliza hela mSupplay ida-ne’e, maibé iha difikuldade balun, mak hanesan iha mudansa pesoál, ita presiza atu bele ajusta nafatin, tanba ne’e ohin oportunidade tebes atu enkontru atu iha orientasaun tékniku, nune’e ba oin saida mak hosi nasionál bele kompleta no saida mak parseiru sira ajuda ka fasilita, atu nune’e mSupplay ne’e bele la’o ho di’ak. Entaun ita espera mSupplay ne’e bele responde ba nesesidade Ministériu Saúde nian, utiliza atu atende komunidade nian hakarak atu asesu ba ai-moruk konsumavel no ekipamentu médiku inklui suplementu ba nutrisaun nian iha ita-nia rain”, nia relata.
Iha fatin hanesan, Diretór Ezekutivu Institutu Nasionál Farmasia Produtu Medikamentu (INFPM), Brigido Dias, dehan enkontru ida ohin ne’e organiza hosi Diresaun Nasionál Farmasia no Produtu Médiku (DNFPM), kona ba uza sistema mSupplay atu kontrola estoke ai-moruk iha Timor-Leste.
“Durante ne’e, Minsitériu Saúde servisu hamutuk ho parseiru DFTA Austrália suporta hela sistema ida mai atu bele uza hodi kontrola no atualiza situasaun ai-moruk iha rai laran dezde prosesu kuantifikasaun to’o hatama mai no halo distribuisaun ba kada fasilidade saúde sira”, Brigido esplika.
Nia haktuir, INFPM ho DNFPM mak hanesan operadór ho nune’e mak enkontru ohin ne’e atu hareee nia sustentabilidade ba oin.
Jornalista :Felicidade Ximenes
Editór : Zezito Silva
