DILI, 31 jullu 2024 (TATOLI) – Diretór Aprovizionamentu Institutu Nasionál Produtu Médiku no Farmaseútiku, Mariano da Silva Marques, hateten INFPM simu tan medikamentu iha 26 to’o 30 jullu, hosi empreza importadór Belsanto, Salimagu, Stamford Medical no Fundo Global ne’ebé maka hatama hosi Singapura, Malázia no Indonézia.
“Ami simu tan ai-moruk hosi empreza importadór sira hanesan Belasanto, Salimagu, Stamford Medical no Fundo Global, ne’ebé mai hosi Singapura, Malázia no Indonézia”, Mariano da Silva dehan ba TATOLI iha nia kna’ar fatin INFPM Kampu Alor, ohin.
Nia hateten, produtu médiku sira ne’e, ekipa sei halo inspesaun no resepsaun atu rai iha armajen INFPM molok fahe ba sentru saúde sira.
“Produtu médiku sira ne’e entrega tuir kontratu aprovizionamentu entre empreza ho Institutu Nasionál Produtu Médiku no Farmaséutiku (INFPM),” nia afirma.
Medikamentu hirak ne’e simu ona hosi INFPM, hanesan Ibuprofen tab 400mg, Metaclopramide 10mg tab, Injesaun Ketamina, Injesaun Ephederine HCL, BD Sódiu Bikabonatu, Motoclopramide Hydrochloride, Amoxicillin tab 500mg, Teste Diagnóstiku Rápidu Hepatitis B, Teste Diagnóstiku Rápidu Hepatitis C, Teste Diagnóstiku Rápidu Sífilis (26 Jullu), Rifampicin 150 mg/Isonazid 75mg/Pyrazinamide 400mg/Ethambutol 275 mg/film coated tables, pac of 672 Blister (S), Corsona 4 mg, Nystatin 500,000IU, Dexamethasone.
Jornalista : Felicidade Ximenes
Editór : Zezito Silva
