KM aprova akordu kontribuisaun millaun $19,6 husi Japaun hodi rekualifikasaun HNGV
DILI, 31 jullu 2024 (TATOLI) – Governu liu husi reuniaun Konsellu Ministru (KM), kuarta ne’e, iha Palásiu Governu Dili, delibera hodi aprova Akordu Kontribuisaun Finanseiru entre Timor-Leste no Ajénsia Kooperasaun Internasionál Japaun kona-ba Projetu Rekualifikasaun Hospital Nacional Guido Valadares (HNGV) ho orsamentu hamutuk millaun $19.6
Ba akordu ne’e, Governu fó konfiansa tomak ba Ministra Finansa, Santina José Rodrigues F. Viegas Cardoso mak sei asina ho Japaun.
“Tuir akordu ida-ne’e, Japaun sei fó kontribuisaun finanseira hamutuk millaun $19,6” refere nota ne’ebé Agência TATOLI asesu husi media Gabinete Primeiru-Ministru.
Finansiamentu ida-ne’e ho objetivu atu haforsa kapasidade prestasaun servisu no hadi’a kualidade kona-ba kuidadu médiku sira, liuhusi konstrusaun instalasaun foun no fornesimentu ekipamentu médiku nian sira ba Hospital Nacional Guido Valadares.
Projetu ne’e inklui edifísiu andár lima, ne’ebé sei fahe ba unidade pediatria no kuidadu intensivu. Edifísiu foun ne’e prevee sei ramata iha Abríl tinan 2027.
Jornalista: Hortencio Sanchez
Editór: Florencio Miranda Ximenes
