DILI, 31 jullu 2024 (TATOLI)—Komunidade uma-kain 184 hela iha Eis-Asrama BRIMOB, Kampung Baru, aldeia 04 setembru, suku Comoro, husu Ministériu Interiór (MI) halo diálogu ho komunidade molok halo konstrusaun ba Kazerna no Armazenamentu ba Polísia Nasionál Timor-Leste (PNTL).
Portavós, Januario Amaral de Jesus, hateten, bazeia ba planu no programa Governu nian, liuhusi Ministériu Interiór ne’ebé identifika ona área Eis-Asrama BRIMOB Kampung-Baru, aldeia 04 setembru suku Comoro, sai hanesan alvu ba estabelesementu kazerna ho armazenamentu ba instituisaun seguransa interna nian.
“Ami komunidade ne’ebé hela iha Eis-Asrama BRIMOB ne’e ho totál populasaun hamutuk 1,106 no uma-kain hamutuk 184 ne’ebé hela iha área ne’e, durante tinan-25 ona (hahú husi tinan-1999 to’o mai agora), ami koopera ho Governu nia planu no programa ba dezenvolvimentu nasaun nian maibé ami husu tenke halo diálogu molok mai halo levantamentu dadus ka halo konstrusaun,” Januário Amaral de Jesus, hateten, liuhusi konferénsia imprensa ne’ebé hala’o iha Kampung Baru, Dili, kuarta ne’e.
Nia hateten, sira-nia parte husu MI tenke halo diálogu tanba informasaun neʼebé autoridade lokál; xefe suku no xefe aldeia informa ba sira iha, 20 jullu 2024 katak fatin sira hela planu atu harii kazerna no armazenamentu PNTL sira prontu atu koopera no apoiu Governu nia planu ba dezenvolvimentu iha rai ne’e.
“Nune’e ami hato’o kedas karta pedidu ba Ministériu Interiór hodi bele hasoru malu direita ho komunidade halo diálogu atu hato’o informasaun ne’ebé kle’an no klaru kona-ba planu refere, bainhira atu halo assessment ka levantamentu dadus iha nia fatin hanesan konsagra ona iha Konstituisaun RDTL artigu, 40o.1 hatuur ona katak, ema hotu-hotu iha direitu ba liberdade ko’alia nian no direitu atu hetan informasaun ruma no tan informasaun lolós nían,” nia dehan.
Maibé iha kinta-feira 25 jullu 2024, tuir portavós ne’e, ekipa neʼebé lideradu husi Asistente Superintendente Polísia, Carlito Adoro, mai ho ekipa boot, hodi halo levantamentu dadus sein iha informasaun detallu no fixu ba komunidade iha área ne’e.
Husi kazu referidu sira rekoñese MI la konsidera pedidu husi komunidade nian, atu halo dialogu antes hala’o levantamentu dadus. “Ministériu Interiór no Komisáriu Nasionál PNTL, la kumpri pedidu ne’ebé komunidade hato’o ona hodi hasoru malu direita ho komunidade,” nia akresenta.
Nia afirma, ekipa ne’ebé ba halo levantamentu dadus ho forsada, tanba ho ekipa seguransa PNTL mai ho arma no sira-nia prezensa halo trauma ba komunidade iha área referida.
Asaun hirak ne’e la kumpri ba Konstituisaun RDTL artigu 147o, Polísia no Forsa Seguransa sira, hateten iha alinea 1, Polísia sei defende legalidade demokrátiku no garante sidadaun sira-nia seguransa internu, maibé sira labele iha partidu polítiku.
Alinea rua hateten, prevensaum kriminál tenke hala’o ho respeitu ba direitu umanu. Inklui Lei Orgániku Polísia Nasionál Timor-Leste (PNTL) nian artigu 4o kona-ba atuasaun hotu-hotu tenke respeita ba direitu umanu.
Tanba Povu hanesan parte ida husi Estadu ida-ne’e no na’in ba dezenvolvimentu ida-ne’e iha direitu tomak atu iha fatin ida-ne’ebé dignu ba sira hodi hala’o sira-nia knaar loron-loron no kontribui ba dezenvolvimentu nasionál bazeia ba Konstituisaun RDTL artigu 58 okatak, ema hotu iha direitu ba nia an, nia família atu iha uma ida ho nia dimensaun no kondisaun di’ak, moos no konfortu atu bele iha intimidade ba ema ida-idak no privasidade familiar.
“Ho ida-ne’e, ami rekomenda ba IX Governu Konstitusionál, bazeia ba planu no programa atu halo, ami husu, konstrui kazerna no armazenamentu ba PNTL dook husi komunidade, nune’e labele halo perturbasaun ba movimentu públiku, tanba ezisténsia kazerna refere iha komunidade nian leet no la’ós Komunidade mak sai fali seguransa ba PNTL maibé PNTL mak sai seguransa ba komunidade,” nia husu.
Komunidade iha Eis-Asrama BRIMOB prontu atu halo arrendamentu ba Governu. Maibé Governu atu konstrui bairru foun karik labele dook ka sai husi área aldeia 4 setembru, suku Comoro tanba komunidade afetadu sira, administrativamente hola parte ona iha suku Comoro no mós hola parte hanesan sarani ida iha Bairru/Grupu Orasaun Maria Auxiliadora, Parókia Comoro nian.
Seluk mak, labarik barak maka eskola besik área afetadu hanesan, Eskola São Pedro, Maria Auxiliadora, 30 de Agosto, Escola númeru, 05 Comoro, São Miguel, Nicolau Lobato, Sentru Formasaun, Don Bosco, ETDA, Colégio Maria Regina Guteres, Fundasaun Hadomi Timor, Labeh, no seluktan.
Estadu direitu demokratiku ida-ne’e harii bazeia ba vontade povu nian no respeita ba povu nia direitu no dignidade moris povu nian, tanba ne’e konsagra ona iha Konstituisaun RDTL artigu 1 Aline 1 hatuur ona katak, Repúblika Demokratika Timor-Leste Estadu ida ne’ebé demokrátiku, soberanu, ukun-an no ida mesak, harii husi povu nia hakarak no iha respeitu ba dignidade ema moris ida-idak nian.
Aleinde ne’e, iha programa IX Governu Konstituisionál ne’ebé sita prioridade neen, husi prioridade hirak ne’e sai númeru primeiru mak, reafirmasaun ba Estadu direitu demokrátiku.
Jornalista : Arminda Fonseca
Editór : Rafael Ximenes de A. Belo
