DILI, 31 Jullu 2024 (TATOLI) – Ministru Interiór, Francisco da Costa Guterres, lamenta ho hahalok membru Polísia Nasionál Timor-Leste (PNTL) ho inisiál AF ne’ebé fó pistola ba ema sivíl ho inisiál HF hodi bá kasa animál no ameasa komunidade iha aldeia Uatua, suku Gariuai, postu administrativu Baucau Vila.
Ministru hateten hahalok oknum PNTL ne’e krime no kazu ne’e rasik komandu, liuhusi Departamentu Justisa loke ona prosesu investigasaun ba membru ne’e hodi aplika prosesu disiplinár no kriminál.
“Hahalok ida ne’e hau konsidera krime. Agora investiga ona membru PNTL, ne’ebé iha prosesu investigasaun mak nia komete tenke aplika disiplina tuir estatutu PNTL nian”, Francisco Guterres afirma iha Palásiu Governu.
Governante ne’e reforsa katak bainhira membru PNTL ne’e mak komete atu krime maka medida ne’ebé atu aplika mak sei la hasa’e nia diviza no halo suspensaun, signifika sei iha buat barak mak sei aplika no ida ne’ebé krime sei prosesa tuir lei, tanba sasán sensivel ne’ebé Estadu entrega ba membru PNTL ne’e atu hala’o knaar hodi proteje povu no nasaun, maibé fó fali ba ema sivíl mak utiliza.
“Ha’u lamenta tebes hahalok oknum membru PNTL ne’ebé uza sasán Estadu fó ba ema sivíl ba ameasa komunidade no kasa animál”, nia reitera.
Problema ne’e mós levanta ona iha Parlamentu Nasionál husi deputadu bankada opozisaun PLP bainhira simu informasaun husi populasaun sira iha Baucau.
Deputadu PLP, Hélder Freitas, hateten iha loron 14 Jullu, iha tuku 21h00, joven ida utiliza pistola polísia nian hodi bá ameasa komunidade iha aldeia Uatua no daudaun joven ne’e autoridade seguransa detein tiha ona.
“Tuir rezultadu investigasaun, joven ne’e informa ba polísia katak, pistola ne’e polísia nian. Tuir regra, loloos tempu serbisu polísia sira bele kaer pistola, kuandu sai ona husi serbisu pistola ne’e hela iha kantor, maibé de repente de’it nia sobriñu rasik kaer fali pistola hodi bá ameasa komunidade to’o atu tiru, ne’e la bele”, nia preokupa.
Tanba ne’e, nia husu ba Ministru Interiór atu halo investigasaun ida adekuada, tanba oknum polísia ne’e kontra regra uzu arma nian.
Jornalista: Tomé Amado
Editora: Maria Auxiliadora
