Opozisaun husu CLN kontinua halo intervensaun foos folin baratu to’o área rurál
DILI, 31 jullu 2024 (TATOLI)—Deputadu opozisaun husi bankada KHUNTO iha Parlamentu Nasionál, António Verdial de Sousa, husu Sentru Lojístika Nasionál (CLN, siglá portugés) atu kontinua halo intervensaun folin foos baratu ba to’o área rural, nune’e fasilita kapasidade kompra povu kiik sira tanba iha munisípiu balun foos kada saku folin sa’e ona ba $22.
“Presiza haree ninia mekanizmu intervensaun ba iha territóriu hodi to’o ba iha área sira-ne’ebé povu kiik sente halerik tebes ba presu foos. Presiza mós aumenta kuantidade intervensaun foos barak liután,” Nia hateten ba Agência TATOLI iha resintu Parlamentu Nasionál, kuarta ne’e.
Haree ba situasaun folin foos kontinua sa’e, membru husi órgaun lejislativu ne’e husu Governu atu haree estratéjia di’ak hodi bele buka solusaun atu estabiliza presu foos.
“Mezmu antes ne’e Governu fó subsídiu ba empreza sira hodi sosa foos, maibé realidade foos folin iha nível nasionál ba to’o área rurál kontinua sa’e ba beibeik iha merkadu. Ida-ne’e Governu hanesan órgaun ezekutivu presiza iha estratéjia no asaun hodi solusiona,” nia hateten.
Tan ne’e, mezmu folin foos ne’e sa’e mai husi nasaun importadór sira, nune’e parte ezekutivu presiza tun ba iha terrenu haree ninia motivu saida, tanba povu iha baze halerik tebes ba presu foos nune’e bele hamosu estratéjia hodi solusiona.
Deputadu CNRT, Domingos Agusto “Deker”, preokupa folin sasán ne’ebé daudaun sa’e, nune’e husu Governu presiza haree.
“Husu Governu atu bele karik halo ona rezolusaun ruma hodi kontrola presu sasán. Ita haree, realidade iha ita-nia rai povu ho ekonomia ne’ebé la natoon, maibé kompañia sira fó presu sasán tuir sira-nia hakarak. Ha’u hakarak foti kompaña sira fornese mina ba instituisaun sira, tuir informasaun ne’ebé simu husi Konsellu Kombatente Libertasaun Nasionál katak kompañia ne’ebé fornese mina ba sira-ne’e karun liu kompara ho kompañia sira seluk,” nia dehan.
Vise Ministru ba asuntu Parlamentár, Adérito Hugo da Costa, sei envia preokupaaun ne’e ba ministéiru relevante atu haree kona-ba fornesedór kombustivel la tuir presu iha merkadu.
Jornalista : Nelson de Sousa
Editór : Cancio Ximenes
