Alerta : Kuidadu ba moras ISPA
DILI, 01 agostu 2024 (TATOLI) – Médiku Jerál iha Sentru Saúde Komoro, Rina Jesuina da Cruz, husu ba ema hotu atu prevene aan hosi moras Infensaun Vias Respiratória Aguda (ISPA).
Sentru Saúde Comoro, kada loron, rejista moras ISPA, tanba ne’e, profisionál saúde sira husu ema hotu atu sai ba liur ka fatin ruma tenke uza mascara, hodi prevene moras ISPA .
“Ami atende mak moras ISPA, maioria afeta barak liu ba labarik tanba ne’e sai ba liur uza máskara hodi prevene aan no tuir mai mak diarea, moras kulit no mós moras sira seluk”, Rina Jesuina da Cruz informa ba jornalista sira iha SSK, ohin.
Nia dehan, moras ISPA kauza barak hosi klima, dala balun udan tiha depois para, ida-ne’e halo rai-rahun maka’as hodi afeta moras ida-ne’e.
“Ita haree, ita-nia nasaun agora klima udan, loron manas rai-rahun, balun laiha koñesimentu, entaun moras ne’e afeta ba sira hodi hetan moras sira ne’e”, nia informa.
Nia esplika, pasiente balun moris laiha ijiene, ladún tau atensaun ba fase liman, la fase hahan halo moos ka hetan hahan ne’ebé kontaminadu, entaun afeta ba moras diarea.
Nia relata, Sentru Saúde Comoro iha medikamentu atu halo tratamentu ba pasiente sira ho moras ISPA.
“Ita-nia ai-moruk sufisiente atu halo tratamentu ba pasiente sira ne’ebé mak mai halo tratamentu iha ne’e”, nia esplika.
Janeiru to’o juñu, Sentru Saúde Comoro rejista moras ISPA hamutuk 412.97, Diarea 7.402, Pneumonia 3.858, Scabies 531, Diarea ho ran 201, Asidente tráfego.183, Urethral discharge 268 no moras kulit seluk hamutuk 10.636.
Jornalista : Felicidade Ximenes
Editór : Zezito Silva
