Top

Membru PN husu ekipa konjunta reativa operasaun kontrola sirkulasaun viatura Estadu

Viatura Estadu. Imajen TATOLI/Egas Cristóvão

DILI, 01 agostu 2024 (TATOLI)—Membru Parlamentu Nasionál (PN) liuhusi Deputadu CNRT, Natalino dos Santos, husu ekipa konjunta kompostu husi Komisaun Funsaun Públika (CFP, siglá portugés), Komisaun Anti-Korrupsaun (CAC), Polísia Nasionál Timor-Leste (PNTL) liuhusi Unidade Tránzitu, Inspesaun Jerál Estadu (IJE) no Patrimóniu Estadu atu reativa operasaun konjunta hodi kontrola sirkulasaun viatura Estadu sirkula iha sábadu-domingu.

“Presiza atu halo ida-ne’e, hanesan kna’ar ida-ne’ebé Governu atribui ona kompeténsia ba instituisaun sira-ne’e, hodi haree sira-ne’ebé laiha autorizasaun utiliza karreta Estadu nian iha loron feriadu no iha kalan, laiha autorizasaun fó sansaun,” Deputadu Natalino dos Santos hateten hodi responde ba Agência TATOLI iha resintu Parlamentu, kinta ne’e.

Tan ne’e, presiza intensifika operasaun hodi hala’o fali atividade operasaun konjunta ho regulár, tanba ekipa konjunta hala’o ona operasaun antes ne’e no agora laiha kontinuasaun.

Tanba, tuir observasaun ne’ebé iha nota katak uluk ekipa konjunta halo operasaun ativu sirkulasaun viatura Estadu iha loron sábadu no domingu ho liu oras serbisu laiha liu, maibé agora atividade paradu entaun iha fim-de-semana sirkulasaun viatura Estadu barak tebes.

Mezmu nune’e, Deputadu Natalino dehan, Estadu hasai ona regra liuliu ba instituisaun Estadu hotu katak utilizasaun viatura iha oras serbisu, eseptu ba sira-ne’ebé hala’o serbisu importante hetan autorizasaun iha fim-de-semana no liu oras serbisu.

Bainhira laiha autorizasaun utiliza karreta Estadu sirkula iha loron sábadu no domingu no liu oras serbisu nian ba atividade privadu ne’e, konsidera bele hanesan korrupsaun.

Tanba ne’e, nia bolu atensaun fila-fali, depende ba desizaun Governu no instituisaun ne’ebé iha atu halo inspesaun, tanba kada liña ministérál iha nia lojístika atu kontrola no halo inspesaun tanba iha tiha ona regra.

“Konsiénsia timoroan, lei bandu laiha autorizasaun, di’ak-liu lalika halo sirkulasaun,” nia apela.

Tanba, uza karreta ne’e gasta mina no transporte kada tinan gastu osan boot, nune’e importante presiza utilizasaun efikásia no efisiénsia utiliza orsamentu Estadu nian tenke iha regra ida, ba ema-ne’ebé utiliza sasán Estadu nian uza kombustível no veíkulu ba duni serbisu Estadu nian.

Antes ne’e, iha 14 jullu ne’e, iha reuniaun plenária komisaun permanente, Deputadu opozisaun PLP, Hélder Freitas “Kamarudi”, Deputadu FRETILIN, António Calau, preokupa sirkulasaun viatura Estadu agora iha sábadu no domingu barak tebes, nune’e husu Governu atu kontrola.

Jornalista : Nelson de Sousa

Editór        : Cancio Ximenes

Publisidade

Leave a Reply

Latest Post

error: Content is protected !!