DILI, 02 Agostu 2024 (TATOLI) – Sekretáriu Estadu Protesaun Sivíl (SEPS), Domingos Mariano Reis, husu ba dirijente sira iha Autoridade Protesaun Sivíl (APC, sigla portugés) atu entende di’ak planu no programa sira ne’ebé kada diresaun sira planeia ona ba 2025, nune’e bainhira iha ezekusaun orsamamentál labele hasoru difikuldade.
“Ha’u husu atu domina ita-boot sira-nia programa, nune’e sei domina mós nia implementasaun. Programa sira ne’e trasa ba 2025 sei la sai dúvida ba ita-boot sira. Labele tau iha programa depois lahatene atu implementa no hahú husi ne’ebé”, Sekretáriu Estadu Domingos dehan ba dirijente sira iha Caicoli, ohin.
Programa APC nian ne’ebé kontinua trasa ba tinan oin mak kona-ba Dezenvolvimentu Institusionál no Sistema Seguransa Nasionál. Orsamentu ne’ebé sei aloka ba tinan oin hamutuk millaun $6,4.
Ba Programa Dezenvolvimentu Institusionál presiza tau atensaun ba kapasitasaun rekursu umanu, instala no dezenvolve infraestrutura, halo kooperasaun ho parseiru internasionál no nasionál sira, nomós oinsá apoia rekursu iha Autoridade Protesaun Sivíl hodi responde ba nesesidade sira.
Ba Sistema Seguransa Nasionál nian oinsá atu prepara resposta no rekuperasaun, bainhira populasaun sira sai vítima ba dezastre naturál, nune’e saida maka APC presiza halo mak prepara rekursu umanu no materiál hodi hatuur iha programa 2025 nian.
“Husi programa prioridade rua ne’e bainhira atu ezekuta ho didi’ak, parte Autoridade Protesaun Sivíl tenke hatuur nia planu orsamentu sira ba 2025 nian, nune’e bele reponsabiliza iha futuru, bainhira aprezenta ona ba Komisaun Revizaun Orsamentu Polítiku (KROP) no husi orsamentu sira ne’e bainhira atu ezekuta tenke promove poupansa atu garante sustentabilidade Estadu no dezenvolvimentu nasaun nian”, afirma.
Lembra katak orsamentu APC nian orsamentu ba tinan ida ne’e hamutuk millaun $7,9 ne’ebé ezekuta ona 48,4%. Ba verba ne’ebé iha sei responde ba vítima dezastre naturál sira, tanba iha família hamutuk 676 mak hein hela apoiu.
Jornalista: Tomé Amado
Editora: Maria Auxiliadora
