DILI, 02 agostu 2024 (TATOLI)—Komisaun Organizadora husi Parókia Nossa Senhora Imaculada da Conceição, Katedrál Dili, daudaun ne’e provizóriamete rejista ona sarani hamutuk 1.952 sei partisipa misa ne’ebé prezide diretamentu husi Papa Farncisco, iha loron 10 setembru 2024, iha Tasi-tolu.
Pesoál Servisu Rejistu, Natalino Martins, hateten, sarani sira husi Parókia Katedrál ne’ebé halo ona rejistu maihusi estasaun lima hanesan Vila-Verde, Colmera, Caicoli, Bairru-Pité no Ailok-laran.
“Kada loron ita simu sarani sira husi estasaun lima ne’e, sira mai rejistu lori dokumentu hanesan eleitorál no sertidaun batizmu. Ida-ne’e ba kuaze Parókia 10 iha Dili laran, Parókia Katedrál rasik provizóriu simu ona sarani hamutuk 1.952,” Natalino Martins, informa ba Agência Tatoli, iha Parókia Catedral Dili, sesta ne’e.
Rejistrasaun ba sarani ne’e hahú iha loron 11 jullu no sei taka iha loron 12 agostu.
“Durante rejistrasaun la’o ita la fó limitasaun ba sarani sira, ita loke to’o loron termina mak taka, tanba ne’e ami husi ekipa rejistrasaun, husu ba sarani sira ne’ebé karik iha vontade espirituál hakarak partisipa misa iha ita-nia vizita Papa ne’e, bele hakbesik-an mai uma-kreda, liu-liu kada Pároku sira bele tau naran nune’e to’o loron ita hotu bele hola parte iha misa,” nia akresenta.
Sarani sira ne’ebé rejistu ona sei hetan kartaun no husi kartaun ne’e sei tau mós kódiku QR ka kódiku resposta rápida ho rejistu ne’ebé gratuita.
“Iha ne’e ami na’in-ualu mak loron-loron halo atendimentu ba sarani sira ne’ebé hakarak mai rejistu atu partisipa misa,” nia tenik.
Notísia relevante : MI sei aumenta membru polísia iha fronteira iha vizita Papa Francisco
Iha fatin hanesan, Sarani husi Parókia Katedrál, estasaun Ailok-Laran, Hipolito Maia Babo, sente kontente bele rejista ona hodi partisipa misa iha vizita Papa, tanba faze ne’e hanesan preparasaun pesoál ida atu simu Amu Papa.
“Ami haksolok tebes tanba Parókia bele fasilita ami halo rejistu ho maneira ne’ebé di’ak tebes hodi partisipa misa iha Tasi-tolu, hanesan sarani ida ha’u sei fahe informasaun ba maluk sarani sira seluk atu mai rejistu hotu, tanba balun hakarak partisipa misa maibé seidauk iha informasaun,” nia tenik.
Nune’e mós, Sarani husi Parókia Katedrál, Violanda da Costa Belo, hateten, ohin loron halo rejistu iha Parókia Katedrál hodi hetan kartaun partisipasaun misa.
“Nu’udar sarani sente kontente tebes tanba bele hetan vizita husi Papa, espera ho vizita ne’e bele fó bensaun di’ak ba ita-nia rai, liu-liu ba situasaun ka problema hotu ne’ebé nasaun ida-ne’e enfrenta bele hetan solusaun iha futuru,” nia katak.
Jornalista : Arminda Fonseca
Editora : Julia Chatarina
