DILI, 02 agostu 2024 (TATOLI)—Parlamentu Nasionál (PN) liuhusi Komisaun D trata asuntu Ekonomia no Dezemvolvimentu, lideradu husi Vise Prezidente, Deputadu Manuel Henrique Noronha, no akompañadu husi membru komisaun, Deputadu Antoninho Bianco, partisipa semináriu konjunta ne’ebé organiza husi Asean Inter-Parlamentary Assembley (AIPA) iha Sthala Ubud, Bali, Indonézia.
Semináriu ne’e hala’o durante loron rua ne’ebé realiza iha loron hirak liu-ba no semináriu konjunta ne’e organizadu husi AIPA no apoiu husi FAO ho kolaborasaun téknika husi Institutu Internasionál Dezenvolvimentu Sustentável (IISD) no apoiu husi reprezentante Parlamentu Nasionál Republik Indonesia (RI) nian.
Semináriu konjunta ne’e nu’udar kontinuasaun diskusaun no diálogu ba finalizasaun kuadru implementasaun Parlamentár 2025-2030, ba implementasaun ASEAN RAI.
Semináriu ne’e rasik nu’udar follow up ba rezolusaun ne’ebé adota iha asembleia jerál AIPA 44ª tinan 2023 kona-ba enkoraza aplikasaun ASEAN guidelines ba promosaun investimentu responsável iha agrikultura (RAI).
“Ho objetivu atu mellora kompreensaun husi Parlamentár kona-ba investimentu responsável iha agrikultura, alimentasaun no floresta hodi enfatiza papel Parlamentár nian iha promosaun ba investimentu ne’ebé responsável iha ASEAN,” refere komunikadu imprensa ne’ebé Agência TATOLI asesu husi mídia Parlamentu Nasionál, sesta ne’e.
Semináriu ne’e fasilita kolaborasaun parte interresa oioin entre Parlamentár no polítiku sira, setór privadu, sosidade sívil no akadémika no halibur hanoin husi parte interresada relevante iha implementasaun ASEAN RAI.
Aleinde estabelese rede ida entre parte prinsipál sira no haburas kompromisu ida ba kolaborasaun ba implementasaun no fiskalizasaun efetivu ASEAN RAI, no kontinua dezenvolve no finaliza kuadru implementasaun Parlamentár ASEAN RAI nian.
Enkuantu, semináriu konjunta ne’e hala’o ho susesu no konsege finaliza kuadru implementasaun Parlamentár ASEAN RAI no kuadru implementasaun Parlamentár ne’e sei aprova iha asembleia jerál.
Jornalista : Nelson de Sousa
Editór : Cancio Ximenes
