Timor Leste-Vietname asina akordu izensaun vistu ba passaporte servisu no diplomátiku
DILI, 02 agostu 2024 (TATOLI) – Ministru Negósiu Estranjeiru no Kooperasaun (MNEK), Bendito dos Santos Freitas ho Vise Ministru Negósiu Estranjeiru Vietname, Do Hung Viet, asina akordu kona-ba aplikasaun ijensaun vistu ba passaporte servisu no diplomátiku entre Timor-Leste ho Repúblika Sosialista Vietname.
Sasin ba asinatura akordu ne’e mak Prezidente Repúblika, José Ramos-Horta ho nia omólogu Prezidente Repúblika Sosialista Vietname, To Lam, hafoin remata enkontru bilateral iha Palásiu Prezidensiál.
“Iha prosesu enkontru ne’e mós termina ho asinatura akordu ida kona-ba ijensaun vitu ba passaporte servisu no passaporte diplomátku. Ida-ne’e hanesan prisíspiu ida-ne’ebé Timor-Leste nia adezaun ba ASEAN, hanesan parte integrante katak, país ASEAN sira ita iha konkordánsia ba akordu ijensaun vistu ba passaportes servisu no diplomátiku, aumezmu tempu sei trata ba ijensaun ba passaporte ordináriu, ita espera katak, kooperasaun bilaterál entre Timor-Leste ho Vietname, bele forte liután,” Ministru Bendito tenik liu hosi nota ne’ebé Agência TATOLI asesu, ohin.
Governante ne’e akresenta Timor-Leste ho Vietname selebra ona akordu kona-ba ijensaun vistu ba passaporte servisu no diplomátiku, tanba ne’e mu’udar prinsípiu adezaun Timor-Leste nian ba ASEAN.
Ministru Bendito dehan tan ne’e, destaka mós kona-ba mekanizmu valor no prinsípiu kooperasaun ida-ne’ebé mak Vietname bele tulun Timor-Leste nia adezaun ba ASEAN, no apresia mós Timor-Leste nia susesu lubuk ida-ne’ebé alkansa hodi bele sai membru plenu ba ASEAN inklui Organizasaun Mundiál Komérsiu.
“Importante liu mós ohin ita-nia Prezidente Repúblika mós husu atu Vietname estabelese ona embaixada iha Timor-Leste, tanba ita tau ona ita-nia embaixada iha país ASEAN sira hotu, agora Vietname mós tau nia embaixada iha Timor-Leste di’ak teb-tebes, nestemomentu Embaixadór Vietname ne’ebé kobre ba Timor-Leste ne’e nia rezidente iha Jakarta,” Ministru Bendito dehan.
TL ho Vietname hametin kooperasaun bilaterál
Molok ne’e, Prezidente Repúblika, José Ramos Horta, hala’o enkontru bilaterál ho Prezidente Repúblika Sosialista Vietname, To Lam, halo sorumutu Estadu hodi reforsa kooperasaun bilateral entre nasaun rua.
Ministru Bendito Freitas ne’ebé akompaiña iha reuniaun ne’e, informa, Timor-Leste ho Vietname kria mekanizmu kooperasaun polítika ida hodi diskute hamutuk programa kooperasaun entre nasaun rua.
“Ohin iha enkontru bilaterál ne’e, Prezidente Repúblika Vietname nian husu atu estabelese mekanizmu kooperasaun polítika nível Ministériu Negósiu Estranjeiru, Ministériu ba Assuntu Ekonómiku no Ministériu sira seluk para ekipa téknika bele halo diskusaun kona-ba elementu halo parte kooperasaun importante entre Timor-Leste ho Vietname,” katak.
Kriasaun ba mekanizmu kooperasaun ne’e, sei lidera husi MNEK Timor-Leste ho Vietname, ne’ebé envolve mós Ministériu relevante, atu bele diskute substánsia kooperasaun iha área hanesan ekonomia, agrikultura, kapasitasaun rekursu umanu, formasaun profissional, konsulta polítika diplomátika no mós edukasaun liuliu ensinu superiór no seluk.
“Iha mós komisaun konjunta ne’ebé bele haree ba aspetu kooperasaun ekonómika, ida-ne’e klaru katak, kompeténsia tomak ita-nia Vise Primeiru-Ministru ba Assuntu Ekonómiku, atubele halo diskusaun kona-ba substánsia kooperasaun iha área ekonómika, agrikultura mós sai parte integrante, tanba Vietname hanesan nasaun ida-ne’ebé potensiál teb-tebes ba agrikultura, iha tinan kotuk, ita-nia Governu mós iha kooperasaun ho Vietname kona-ba komérsiu de arros,” MNEK tenik.
Jornalista: Hortencio Sanchez
Editór : Florencio Miranda Ximenes
