VIQUEQUE, 05 agustu 2024 (TATOLI)- Bispu Dom Leandro Maria Alves, inaugura IgrejaNossa Senhora de Fatima, iha Parokia Uatulari, munisípiu Viqueque hafoin hetan reabilita husi Dioseze Baucau.
Iha serimónia inagurasaun, Dom Leandro Maria Alves, hateten, Igreja parokia Uatulari kuaze tinan naruk kondisaun aat, nune’e ekipa Dioseze Baucau halo identifikasaun hodi halo reabilita fali.
“Nune’e ohin ita halo re-inagurasaun ba Igreja Parókia Uatalari tanba Igreja hari’i sai hanesan Maromak nian uma ida, sai mahon ba sarani sira iha parókia Uatulari hodi hasa’e devosaun no hametin fiar espirituál nian”, Dom Leandro Maria Alves, hateten hafoin ramata inaugura Igreja Nossa Senhora de Fatima, Uatulari, sábadu (03/08).
Tanba ne’e, Bispu Dioseza Baucau ne’e husu agradese ba empreza Samadare Unip, LDA ne’ebé hala’o reabilitasaun hahú tinan 2023 no agora finaliza.
“Agradese mós Amu sira-ne’e tempu okupasaun sira iha Igreja Uatulari liuliu amu Andre Tane, SDB no Amu Paulo inisia konstrui Igrjea iha tinan 1991 iha tempu disifil nian laran no momentu ne’ebé sira ba sosa simente no batako iha Dili tenke halo guia de marsa ne’e hamutuk 500 mak foin to’o Dili. maibé sira esforsu hamutuk sarani Uatulari konsege hari’i Igreja boot. Ohin mós Amu na’in-rua partisipa hotu iha serimónia inaugura ida-ne’e”, Dom Leandro profunda.
Iha fatin hanesan, Padre Paroku Nossa Senhora de Fatima, Uatolari, munisípiu Viqueque, Heriberto Soares Pedro, husu agradese ba Dioseze Baucau tanba ajuda ona fundu ba reabilitasaun Igreja parókia Uatulari ne’ebé kondisaun aat.
“Tinan barak kondisaun Igreja aat no iha tempu udan been tama ba igreja laran, maibe ho reabilitasaun ne’e ami sarani tomak husi hato’o sentidu agradesimentu ba Dioseze Baucau”, Amu parókia Uatulari agradese.
Iha biban ne’e, Sarani Juvita Soares, agradese ba Maromak tanba igreja parókia hetan ona reabilitasaun tanba durante ne’e udan bee tama no laiha kondisaun ba sarani sira.
“Ida-ne’e ami sente ksolok no orgullu tanba ami-nia uma kreda di’ak fila-fali. Uma foun ona sarani sira kontinua hasa’e fiar ba Maromak no hasa’e orasaun”. nia realsa.
Enkuantu, rebilitasaun ne’e hahhú tinan 2023 no remata iha tinan 2024, empreza resposavél mak Samadare Unip LDA, ho orsamentu ba obra reabilitasaun ho totál $148.829,03.
Jornalista: Vitorino Lopes da Costa
Editór : Florencio Miranda Ximenes
