DILI, 05 agostu 2024 (TATOLI)- Komité Orientadór 25 (CO25), hakerek ona istória rezisténsia Timor-Leste (TL) nian hahú husi tinan 1974 to’o 1975 iha livru volume 1A no entrega ona ba Primeiru-Ministru (PM), Kay Rala Xanana Gusmão iha Palásiu Governu, segunda (05/08/2024).
Livru volume 1A ne’e, CO25 lideradu Prezidente Constâncio Pinto hakerek iha tempu naruk nia laran, hafoin simu mandatu iha Governasaun VIII Governu Konstitusionál hodi halo peskiza no hakerek istória rezisténsia Timor-Leste (TL) nian.
“Ami entrega ona livru volume 1A ne’ebe sei lansa no publika iha tempu barak. Livru volume 1A ne’e ko’alia kona-ba ita nia istória rezisténsia entre 1974 to’o 1975 ho pajina 400-resin,” Constâncio Pinto hateten hafoin ho ekipa hasoru-malu ho Xefe Governu.Ekipa ne’e sente previlejiadu boot tebtebes tanba Primeiru-Ministru rasik kontinua fó apoiu ba C025 hodi kompleta ninia servisu.
Daudaun CO25 hakerek ona livru hamutuk volume 6 ne’ebé tuir planu sei publika uluk livru volume 1A iha tempu badak no livru sira seluk sei publika iha tinan sira tuir-mai.
CO25 hakerek istória rezisténsia ne’e hahú husi tinan 1974 to’o 1999, la’ós de’it istória iha rai-laran maibé mós iha rai-li’ur ne’ebé ko’alia kona-bá frente armada, diplomátika no movimentu solidariedade sira.
CO25 konsidera livru istória ne’e la’ós hakerek biografia ne’ebé fásil no presiza tempu naruk atu hetan dadus ne’ebé loos no tenke halo peskiza inklui konfirma didi’ak ba faktu sira.
C025 estabelese iha tinan 2017 no 2018 foin hahú servisu tanba enfrenta problema orsamentál, mudansa Governu no pandemia COVID-19 no foin servisu loloos iha 2019 no konsege realiza konferénsia iha rai-laran inklui halo viazen ba rai-liur hodi rekolla dadus, maski to’o agora seidauk konsege finaliza transladasaun dokumentu sira husi Portugál ho Austrália.
Livru sira ne’ebé CO25 hakerek iha volume hamutuk neen (6), volume 1A iha pájina 400, volume seluk pájina 400-resin no livru ne’ebé ko’alia kona-bá frente klandestina iha pájina 600.
Livru volume 1A ne’e ko’alia kona-bá Jénesis luta libertasaun povu maubere, volume pré-istória ne’e haree kona-bá orijen povu no nasaun nian molok kolonializmu, volume seluk ko’alia kona-bá sistema Governasaun nian durante okupasaun Indonézia, volume seluk tán ko’alia kona-bá rezisténsia no baze apoiu iha rai-laran ho frente klandestina.
CO25 hakerek livru hirak ne’e ho lian Tetum no Komité rasik tutela ba iha Ministériu Edukasaun, nune’e sei integra iha kuríkullu nasionál.
Iha biban ne’e Xefe Governu, Xanana Gusmão apresia ho servisu CO25 no enkoraza atu kontinua hakerek istória rezisténsia Timor nian husi tinan 1974, 1975 to’o 1999.
Husu mós bá CO25 atu hala’o atividade balun iha ámbitu selebrasaun loron konsulta populár tinan ne’e nian liu-husi diseminasaun no konta istória libertasaun nian ba labarik, joven ho ferik-katuas sira to’o iha área rurál.
TATOLI
