DILI, 05 Agostu 2024 (TATOLI) – Polísia Nasionál Timor-Leste (PNTL) munisípiu Dili identifika ona bar no diskoteka balun ne’ebé halo distúrbiu ba orden públika, liuliu iha tempu kalan, hodi loke múzika ho lian maka’as.
Komandante Poliísia munisípiu Dili, Superintendente Xefe Polísia, Orlando Gomes, relata katak polísia halo ona operasaun iha sábadu kalan (03/08) hodi tama ona bá bar no diskoteka sira iha kapitál hodi informa ona sira atu redús volume múzika ne’ebé toka, nune’e labele perturba ema seluk nia deskansa kalan.
“Ita identifika ona bar no diskoteka lubuk ida iha parte Hudi-Laran, Fatuhada no área Motaél nian, iha Eskuadra Polísia Dom Aleixo no Vera Cruz nian maka sempre halo sira-nia atividade to’o meia noite hodi la kumpre regra sira”, Orlando Gomes dehan iha Caicoli, ohin.
Tanba ne’e, nia orienta ona komandante eskuadra sira atu hala’o sira-ninia serbisu hodi kontinua halo vijilánsia iha operasaun konjunta iha tempu kalan nian hodi tama bá bar no diskoteka sira atu nafatin fó hanoin ba sira katak tempu besik komandu polísia sei hasoru malu ho sira-nia responsavel sira hodi fahe informasaun relasiona ho sira-nia atividade iha kalan, inklui mós preparasaun komandu polísia nian ba seguransa rai-laran iha ámbitu vizita Papa Francisco nian iha Timor-Leste.
Nia adianta katak ba oin komandu sei fó uluk notifikasaun ba bar no diskoteka sira hodi fó hanoin ba sira atu redús atividade barullu iha tempu kalan. “Kuandu notifikasaun polísia fó ne’e maka sira la kumpre, sei iha medida rigoroza hasoru sira. Ita identifika ona iha bar no diskoteka sira no ita sei bolu sira mai iha tempu besik, ita sei informa ba sira situasaun rai-laran nian hahú husi fulan-Agostu ba oin, nune’e sira bele redús oras atividade iha tempu kalan, nune’e bele garante hakmatek iha kapitál Dili”, nia afirma.
Tuir Orlando Gomes, polísia sei la hapara atividade iha bar no diskoteka sira, tanba ne’e sira-nia direitu, maibé obrigasaun mak tenke redús barullu ne’ebé perturba ema seluk nia deskansa kalan, liuliu fatin sira ne’ebé besik liu ho rezidénsia embaixadór sira, padre no madre sira.
Tanba tuir Lei Orden Públika, bainhira iha ona tuku 21h00 ba leten labele iha ona movimentu barullu iha estrada públiku sira. “Karik hakarak halo divertimentu tenke kria bar ka diskoteka ne’e ho kondisaun ida seguru, bainhira toka múzika lian maka’as mós ema iha li’ur labele rona”, realsa.
Iha sorin seluk, Komandante Polísia Eskuadra Dom Aleixo, Inspetór Xefe Polísia Alexandrino da Costa “Samurai”, dehan sira simu ona orden husi Komandante Polísia munisípiu Dili no parte eskuadra ezekuta ona hahú iha sábadu foin lalais ne’e hamutuk halo ona operasaun konjunta.
Huis atividade ne’e Polísia Eskuadra Dom Aleixo identifika iha bar ho diskoteka hitu mak presiza fó atensaun, tanba sira-nia kondisaun ne’e perturba tebes ema seluk nia deskansa kalan.
“Ita sei bolu sira-nia responsavel hotu tuir orientasaun komandu Dili nian, bainhira iha ona notifikasaun sira bele hatene hodi minimiza mós movimentu sira, nune’e bele apoia seguransa ida di’ak liu iha preparasaun vizita Papa nian mai iha ita-nia rain. Tanba husi fatin sira hanesan ne’e maka la tau atensaun, bele kria konflitu sira”, nia hateten.
Notísia relevante: Operasaun konjunta hahú iha Agostu hodi garante Dili hakmatek
Jornalista: Tomé Amado
Editora: Maria Auxiliadora
