Autoridade Baucau sei prevee orsamentu hodi selebra loron Konsulta Populár
BAUCAU, 06 agostu 2024 (TATOLI) – Autoridade Administrasaun Munisipál Baucau sei buka solusaun hodi prevee orsamentu ba selebrasaun loron Konsulta Populár ba da-25.
Sekretáriu Munisipál Asuntu Administrasaun Finansa Munisípiu Baucau, Juvinal Daniel Filipe Belo, esplika, maske seidauk iha kalkulasaun totál orsamentu tanba sei halo ezersísiu maibé Autoridade Munisipál hetan ona orientasaun husi nasionál atu realiza komemorasaun loron 30 agostu husi munisípiu to’o postu administrativu sira.
“Narativu ne’ebé agora ami halo kada 30 Agostu ne’e mil de’it, maibé tinan ne’e komemora mós tinan-25 entaun totál orsamentu seidauk deside, tanba ami sei halo ezersísiu,” Sekretáriu Munisipál Asuntu Finansa hateten iha Vila Nova, tersa ne’e.
Autoridade Munisípiu sei realiza enkontru ho kargu dirijente sira hanesan Diretór Serbisu Munisipál Administrasaun hodi deside totál orsamentu ne’ebé bele akoloka ba serimónia komemorasaun loron konsulta populár ne’e.
*Koloka bazea ba kapasidade orsamentu ne’ebé iha munisípiu nune’e postu administrativu sira mós komemora netik loron ne’e, maibé ita sei halo ezersísiu nune’e orsamentu to’o iha postu,” Juvinal Belo akresenta.
Komisaun Organizadora ba asuntu serimónia mak sei fo-sai fatin selebrasaun inklui planu programa sira hanesan animasaun, vizita osoáriu, missa agradesementu, seminariu ba estudante sira no atividade futeból.
Jornalista : Natalino Belo
Editór : Evaristo Soares Martins
