Top

Deputadu PLP husu ME reabilita EBF iha Samalari

Uma Fukun Parlamentu Nasionál. Imajen/Espesiál

DILI, 06 agostu 2024 (TATOLI)—Deputadu PLP, Helder Freitas ‘Kamarudi’, husu Ministériu Edukasaun (ME) atu tau prioridade iha Orsamentu Jerál Estadu (OJE) 2025 hodi reabilita Eskola Báziku filiál primeiru no segundu síklu iha suku Samalari, postu administrative Baucau Villa, munisípiu Baucau, tanba kondisaun infraestrutura atuál grave tebes.

“Ha’u hakarak koloka, dahuluk eskola bázika filiál primeiru no segundu síklu públiku iha suku Samalari nia kondisaun infraestrutura bázika kalen kuak, plafon dodook no janela maiória kondisaun aat. Ida-ne’e difikulta prosesu aprendizajen ba estudante sira,” nia levanta liuhusi reuniaun plenária komisaun permanente iha Parlamentu Nasionál, tersa ne’e.

Nia dehan, edifísiu eskola refere hamutuk sala rua (2) ne’ebé kompostu husi sala neen (6) konstrui iha okupasaun Indonézia nian to’o agora seidauk hetan reabilitasaun, nune’e bainhira tempu udan no anin boot ne’e, manorin tenke haruka estudante sira fila ba uma sedu.

Nia dehan, iha manorin permanente na’in-ualu (8) maibé na’in-lima (5) tama ona ba idade reforma, tanba ne’e husu ba ME atu tau konsiderasaun atu iha Orsamentu Jerál Estadu (OJE) 2025 hodi bele reabilita eskola ne’e bele rekruta profesór foun.

Deputada FRETILIN, Maria Ana Bela Sávio, levanta preokupasaun kona-ba ninia kontaktu eleitorál iha semana kotuk liu-ba iha baze komunidade sempre levanta manorin sira iha baze la sufisiente.

Vise Ministru ba asuntu Parlamentár, Adérito Hugo da Costa, hateten kompromisu Governu da-sia (IX) ba tinan lima, nune’e sei iha tinan haat atu fó resposta ba preokupasaun sira-ne’ebé iha área edukasaun no durante tinan ida Governu hahú rezolve ona menus profesór liuhusi bolsa kandidatu faze dahuluk no agora kontinua bolsa kandidatu faze daruak.

Jornalista : Nelson de Sousa

Editór        : Cancio Ximenes

Publisidade

Leave a Reply

Latest Post

error: Content is protected !!