DILI, 06 agostu 2024 (TATOLI)-–Koordenadór Gabinete Unidade Kurríkulu Nasionál iha Ministériu Esukasaun (ME), João Maupelu, informa, Edukasaun munisípiu Dili presiza kaderneta eskolár 5.000.
“Sira mai ko’alia no sira bá iha armazen edukasaun nian no sira foti direita, nune’e bele distribui ba nível eskolaridade,” Maupelu hateten ba Agência Tatoli, iha ninia knaar fatin, Vila-Verde, tersa ne’e.
Kada nível eskolaridade prodús kaderneta 40.000, ne’ebé fahe hotu ona ba eskola sira.
“Agora faze tuir mai ita sei prodús tan tuir nesesidade, agora nesesidade ne’e ita sei ajusta, eskola sira iha munisípiu presiza hira, ita sei fó ba munisípiu mak jere,” nia akresenta.
Notísia relevante : ME kada tinan prodús kaderneta eskolár 40.000 ba kada nível eskolaridade
ME distribui ona tinan ne’e kaderneta eskolár ba primeiru períodu.
“Ita distribui ona kaderneta ba primeiru períodu nian, ita imprime iha sentru ba kada nível eskolaridade, ne’ebé ita prodús 40.000 iha sentru Comoro hodi distribui ba pre-eskolár, primeiru no segundu siklu, hafoin terseiru siklu, no sekundáriu. Kaderneta sufisiente ona,” Koordenadór tenik.
ME kontinua prepara kaderneta ho kuantidade hanesan iha armazen, ne’ebé sei distribui iha tinan ida-ne’e nia rohan.
Iha fatin ketak, Diretór Eskola Sekundáriu Jerál (ESJ) Fitun Naroman Timor Lorosa’e (Finantil), Aniceto Barlelo, konfirma katak, parte eskola foti ona kaderneta eskolár hamutuk 445 ba estudante foun sira.
“Ita hatama proposta ba edukasaun munisípiu Dili horiseik nune’e ami foti ona kaderneta eskolár ba estudante hamutuk 445 husi 10° ano. Enkuantu, estudante 11° no 12° ano kontinua utiliza kaderneta antes ne’e,” nia salienta.
Jornalista : Osória Marques
Editora : Julia Chatarina
