DILI, 06 agostu 2024 (TATOLI)–Fundu Dezenvolvimentu Kapitál Umanu (FDCH, sigla portugés) asina akordu ho Universidade Nasionál Timor-Lorosa’e (UNTL) hodi kontratu profesór kubanu na’in-neen, ne’ebé daudaun ne’e hanorin iha fakuldade Edukasaun, Arte no Umanidade iha departamentu Desportu.
“Antes ne’e, UNTL serbisu hamutuk ho Sekretaria Estadu Juventude no Desportu hodi fó kontratu ba profesór na’in-neen iha departamentu Desportu, maibé kontratu ne’e hotu iha fulan-abríl, ne’ebé parte universidade hetan difikuldade atu rezolve problema ida-ne’e, entaun ekipa halo proposta ba iha Ministériu Finansa no Vise Primeriu-Ministru nia fatin maibé orsamentu alokasaun ba ida-ne’e laiha, entaun iha ne’ebá halo despaisu mai fali FDCH. Tanba ne’e mak ita deside selu sira ba fulan-ualu nian,” Diretór Ezekutivu FDCH, Júlio Aparício, informa iha Fatuhada, tersa ne’e.
Nune’e, parte FDCH presiza UNTL nia ajuda hodi rezolve problema sira, tanba antes ne’e mós Embaixadór husi Kuba mai hasoru FDCH.
“Sira dehan ne’e la’ós problema UNTL maibé ne’e entre Estadu Timor-Leste no Kuba. Tanba ne’e mak ami tenke buka solusaun, entaun ami koko buka osan husi liña ministeriál liu-liu iha fatin seluk ne’ebé alokadu, entaun ita deside no apoiu sira hodi selu dosente hahú husi fulan-maiu to’o dezembru tinan ne’e,” nia akresenta.
Notísia relevante : Setembru, ANATL no FDCH sei haruka bolseiru 29 hala’o iha Indonézia
Fundu Dezenvolvimentu antes ne’e aloka osan $139.200 ba UNTL hodi halo kontratu ho dosente kubanu na’in-neen, ba fulan-ualu. Programa ida-ne’e mós entre unidade ho Estadu Kuba, tanba ne’e ba tinan 2025 UNTL tenke solusiona mesak ona.
Reitór UNTL, João Soares Martins, agradese ba FDCH, tanba bele apoiu ona halo kontratu ho dosente sira husi Kuba hodi kontinua hanorin estudante sira iha departamentu Desportu nian, inklui apoiu ba atividade estájiu, peskiza no atividade seluk.
“Agradese tebes tanba ho esforsu tomak bele ajuda ona kontrata dosente sira husi Kuba tanba daudaun ne’e sira hanorin hela iha Departamentu Ensinu Fízika no Desportu, fakuldade Edukasaun Arte Umanidade, no apoiu mós ba atividade estájiu, peskiza no atividade seluk iha UNTL, ne’e ba fulan-ualu, entaun tinan oin UNTL sei buka fali solusaun seluk hodi rezolve,” nia tenik.
Jornalista : Osória Marques
Editora : Julia Chatarina
