DILI, 06 agostu 2024 (TATOLI)–Diretór Ezekutivu Forum Organizasaun Naun Governamentál Timor-Leste (FONGTIL), Valentim da Costa Pinto, hateten FONGTIL hetan apoiu finanseira husi Governu liuhosi Gabinete Dosiedade Sivil iha tinan kotuk ho montante rihun $8 ba implementasaun programa elaborasaun relatóriu final ba servisu membru instituisaun.
Objetivu husi apoiu elaborasaun relatóriu atu bele hatene di’ak-liu funsionámentu no nesesidade instituisaun membru ONG sira.
“Apoiu programa ida-ne’e mai husi Governu liuhusi Gabinete Sosiedade sivil ne’ebé ami uza ba iha fulan tolu iha tinan kotuk, hodi halo elaborasaun relatóriu avaliasaun kapasidade institusionál ba memebru ONG sira no prosesu validasaun,” Diretór Ezekutivu Forum Organizasaun Naun Governamental Timor-Leste (FONGTIL), Valentim da Costa Pinto, hateten ba jornalista sira, iha Caicoli, iha serimonia lansamentu relatóriu finál Avaliasaun kapasidade institusionál membru ONG.
Diretór ne’e esplika, relatóriu ne’e mós atu bele avalia ba funsionamentu membru ONG sira hodi haree kona-ba legalidade no jestaun polítika interna, entaun membru 169 hosi totál 270 mak responde sekretariadu FONGTIL nia pergunta ne’ebé manda iha tinan kotuk, entaun ohin lansa nia rezultadu.
Tuir relatóriu ne’e haktuir, avaliasaun ne’e hala’o tanba hetan deskobrimentu hatudu husi membru ONG ne’ebé ekipa ba vizita direta hodi hala’o avaliasaun maiória sira-nia kapasidade institusionál menus tebes no ikus mai membru ONG sira-ne’e susar atu asesu ba fundu husi doadór sira.
“Defaktu akontese maioria membru ONG sira la hetan oportunidade hodi asesu ba fundu tanba sei menuskapasidade Institusionál nian, ne’ebé seidauk bele kumpre rekezitu husi doadór sira-ne’ebé haree liu ba manuál no polítika organizasaun nian,” nia dehan.
Nia hatutan, FONGTIL mós fó asaun formasaun kada tinan ba membru ONG hamutuk 20-resin iha área jestaun finanseira, igualdade jéneru no protesaun labarik.
“Iha formasaun espesifiku ne’ebé ami fó ba ami-nia membru sira mak hanesan igualdade jeneru no inkluzaun sosiál atu evita prátika asediu seksuál no utilizasaun termu loos ba ema ho defisiénsia sira,” nia hateten.
Nia esplika, membru sira-ne’ebé hetan ona formasaun ne’e atu bele apoiu ba iha ajusta iha sira-nia planu polítika no prátika di’ak ba iha serbisu intervensaun.
Jornalista : Jesuína Xavier
Editór : Cancio Ximenes
