KHUNTO husu Governu tau prioridade dezenvolve eskola TEKVOK

DILI, 06 agostu 2024 (TATOLI—Deputadu husi bankada KHUNTO, António Verdiál de Sousa, husu Governu liuhusi Ministériu Edukasaun atu tau prioridade dezenvolve di’ak liután Ensinu Sekundáriu Tékniku Vokasionál (TEKVOK).
Nia dehan, TEKVOK sai hanesan mentór ba setór produtivu sira, nune’e enkoraja Governu Konstituisionál da-sia (IX) liuhusi Ministériu Edukasaun, espesialmente Sekretáriu Estadu ne’ebé hola responsabilidade ba eskola sekundária téknika vokasionál hodi estimula investimentu iha área ida-ne’e, nune’e bele halo ajustamentu ba relevánsia hodi konkretiza kualidade iha ensinu tékniku profisionál.
“Eskola TEKVOK sai nu’udar alternativa edukasaun ne’ebé bele atribui abilidade téknika nesesária ba joven timoroan sira, tuir nesesidade merkadu serbisu ninian. Ho nune’e, promove relevánsia no kualidade TEKVOK sai nu’udar prioritizasaun ne’ebe urjénsia,” nia hato’o liuhusi deklarasaun polítika iha reuniaun plenária komisaun permanente, tersa ne’e.
Tanba, nia dehan, akompaña kondisaun reál eskola TEKVOK daudaun ne’e enfrenta daudaun problema manorin seidauk prienxe estandarizasaun kualifikasaun nasionál hodi hetan sertifikasaun profisionál, menus ekipamentu ba fasilidade hodi hala’o prátika no laiha biblioteka.
Vise Ministru ba asuntu Parlamentár, Adérito Hugo da Costa, hato’o apresiasaun ba espresaun bankada KHUNTO nian iha setór edukasaun ne’ebé kontinua enfrenta ho misaun ida atu hasa’e kualidade.
Tanba ne’e, nia dehan, Governu Konstitusionál da-sia (IX) kontinua atu iha duni nesesidade ba eskola TEKVOK atu fó resposta ba kampu serbisu ne’ebé iha ba infraestrutura, kualidade ensinu iha territóriu.
Jornalista : Nelson de Sousa
Editór : Cancio Ximenes

