DILI, 06 agostu 2024 (TATOLI)–Diretór Ezekutivu Luta Hamutuk, José Alves da Costa, husu Governu atu kria polítika adekuada no sustentável hodi populasaun bele sente bein-estar no prosperu iha país.
Nia esplika, Timor-Leste nasaun kiik ho povu uitoan ho rikeza naturál mak natoon, labele konstrui politika ida-ne’ebé mak iha ba apoiu sosiál no susbsidiu sira maibé tenke kria kondisaun ida mak oinsá ema hotu bele asesu ba iha kampu traballu nian, atu hetan serbisu no hetan benefisiu husi serbisu rasik hodi hasa’e ekonomia rai ida-ne’e ninian.
“Ida-ne’e importante liu. Se hanesan uluk halo sexta bázika, ita fahe to’o bainhira, ema iha agregada familia ida bele moris foos saku ida durante fulan ida, ita presiza osan hira mak fo moris ba sira hodi sosa fulan-fulan, ida ne’e sai problema oituan”, Diretór Ezekutivu Luta Hamutuk, José Alves da Costa, hateten ba Agência Tatoli nakait ho loron konsulta populár ba da-25 (30 agustu 1999-30 agostu 2024) ne’ebé sei selebra iha 30 agostu tinan ida-ne’e, iha Faról.
Polítika ne’ebé di’ak mak tenke investe iha Orsamentu Jerál Estadu kada tinan, tenke investe ba iha setór produtivu no sustentável sein iha setór minerál.
“Hanesan agrikultura no industria kiik sira, ita tenke hamoris ida-ne’e hodi ema hotu sente empregadu iha serbisu. Se bainhira ema hotu iha serbisu, nia bele fasilita ona oan sira, oan sira la hanoin ona oinsá buka moris maibé buka siénsia ne’ebé di’ak, oinsa komprende siénsia sira-ne’e ho didi’ak no ida-ne’e kontribui ba kualifiksaun rekursu umanu,” nia dehan.
Tuir nia, Timor-Leste iha rai luan tebe-tebes hodi bele dezenvolve setór agrikula hodi bele sustenta país ne’e.
Se ema hotu hetan hahan nutritivu, tuir nia, evita ona ema atu hetan moras, tanba politika di’ak mak ema hotu asesu ba iha setór ekonómika no públika atu hetan fleksibilidade no opsaun atu hetan serbisu.
Diretór ne’e hateten, nasaun barak mak halo ida-ne’e hanesan Austrália sidadaun ne’ebé iha abilidade ba ezerse serbisu loro-loron atu hetan osan no lakohi ba universidade, Estadu fó formasaun no loke kampu detraballu atu servisu no buka osan lliuhosi sistema transparénsia.
“Ba ha’u, hodi fahe foos, mina no roupa ne’e, ita la garantia Estadu ida-ne’e nia futuru. Politika intervensaun merkadu husi Governu mós la benefisia ba populasaun. Dalaruma foos sira-ne’e mós la to’o ba ema sira-ne’ebé presiza, tanba sira faan tuir dalan no ema balun sai tiha husi uma. Ida-ne’e kompañia sira mak hetan lukru, ema sira-ne’ebé hela iha área rurál labele hetan, tanba laiha transporte atu bele to’o iha fatin lalais,” nia hateten.
Governu presiza kovida peritu halo estudu viabilidade ba rai
Diretór ne’e husu ba Governu atu rekruta ema expert atu halo estudu viabilidade rai iha Timor-Leste hanesan ezemplu iha munisipiu Baucau, Covalima, Lautém no Manatuto.
“Ita-nia rai mamuk barak, tanba ne’e mak solusaun ida mak ne’e rekruta ema expert sira hodi halo estudu ba poténsia ita-nia rai sira-ne’e. Governu bele investe inan ba iha ne’ebá hodi bele halo produsaun,” nia dehan.
Tuir nia, rai sira-ne’e iha poténsia ba produsaun agrikola hodi bele halo esportasaun, ezemplu Kakau ka ai-funan hanesan iha rai sira seluk.
Jornalista : Jesuína Xavier
Editor : Cancio Ximenes
