DILI, 06 agostu 2024 (TATOLI) – Xefe Departamentu Matan iha Hospitál Nasionál Guido Valadares (HNGV),Valerio Andrade, hateten atu prevene matan labele mean, ema hotu tenke uza ókulu.
“Matan mean ne’e sai hanesan kazu ida ba pasiente sira, kazu matan mean, tuir nia tempu sijionál konjuntivitis infesaun tuir nia tempu atu matan mean hosi rai-rahun no iha udan bele akontese, maibé iha bailoron tanba rai rahun barak ema la uza protesaun ba matan nian hanesan ókulu sira ne’e, entaun afeta matan ba mean”, Valerio Andrade informa iha nia kna’ar fatin HNGV, ohin.
Nia esplika, bainhira pasiente mak matan mean no izola iha uma laran, sei afeta lalais ba ema seluk ne’ebé besik.
“Iha ema ruma iha uma laran mak matan mean, bele daet liu, tanba ne’e ita tenke izola tiha nia tau iha fatin ketak atu nia labele daet ba ema seluk, ezemplu ema matan mean kaer tiha nia matan pois ba kaer kolega seluk nia matan bele kontamina tan, tanba ne’e ita ko’alia ba batéria ne’ebé bele transmite hosi ema ida ba ema seluk”, nia esplika.
Sentru Nasionál Matan iha Hospital Nasionál Guido Valadares (HNGV), iha fulan-Juñu, pasiente sira ne’ebé halo tratamentu ba problema matan hamutuk 571, maioria ho katarata.
Jornalista : Felicidade Ximenes
Editór : Zezito Silva
