DILI, 06 agostu 2024 (TATOLI)—Prezidente Parlamentu Nasionál (PPN), Maria Fernanda Lay, husu Deputadu no funsionáriu parlamentár tomak atu kria serbisu ekipa ho di’ak liután hafoin resesu tama fali ba sesaun lejislativa daruak.
Nia hato’o agradesimentu ba serbisu hamutuk funsionáriu tomak, sekretáriu jerál PN no Deputadu sira-ne’ebé hala’o iha sesaun lejislativa dahuluk ida-ne’e no espera hafoin resesu ne’e, serbisu ho ekipa sei sai di’ak liután.
“Apela ba deputadu sira atu bele aproveita oportunidade durante resesu, aleinde halo atividade partidáriu, maibé atu aproveita hodi halo tratamentu saúde, tanba bainhira resesu hotu tama fali ita hasoru kedas ho lejislasaun lubun ida no mós proposta-lei Orsamentu Jerál Estadu (OJE) 2025,” Prezidente PN ne’e hato’o iha reuniaun plenária komisaun permanente, iha PN, tersa ne’e.
Ba funsionáriu sira, nia dehan, iha oportunidade atu bele organiza aan serbisu ne’ebé durante ne’e halo serbisu ho halai, tanba tempu hodi bele halo ramata iha sesaun lejislativa dahuluk hodi iha sesaun lejislativa daruak, ema hotu bele prontu halo atividade foun katak sei makaas liután kompara ho sesaun lejislativa dahuluk.
“Ha’u espera katak, iha futuru ita bele serbisu hanesan ekipa ida di’ak-liu tanba ho reforsu ne’ebé fó ba Deputadu sira no reforsu asesór ne’ebé ita foin kontrata, ita bele serbisu ekipa ida di’ak-liu,” nia dehan.
Nia fiar, parte Governu mós sei serbisu makaas hanesan ho PN hafoin TL nia adezaun ba Organizasaun Mundiál Komérsiu (OMK) no tinan oin adere ba iha ASEAN, TL bele iha ekipa ida di’ak-liu hodi ajuda no reforsa malu ba dezáfiu ne’ebé sei hetan.
Entretantu, PN hahú iha 15 jullu 2024 ne’e tama ona resesu no sei tama fali iha 15 setembru 2024, nune’e lejislatura daneen kompleta sesaun lejislativa dahuluk sei tama ba sesaun lejislativa daruak, mandatu lejislatura ida iha tinan lima no iha sesaun lejislativa hamutuk dalimak.
Jornalista : Nelson de Sousa
Editór : Cancio Ximenes
