DILI, 06 agostu 2024 (TATOLI) – Embaixadór Singapura laiha rezidensia iha Timor-Leste, Robin Hu, hateten, prontu apoiu Timor-Leste hodi dezenvolve rekursu umanu liuhusi kapasitasaun atu iha abilidade, nune’e Timor-Leste adere ba Association of Southeast Asian Nations (ASEAN).
“Singapura kontinua oferese formasaun ba timoroan sira iha área oioin nu’udár kontribuisaun ida atu lori Timor-Leste adere ba organizasaun rejionál Association of Southeast Asian Nations (ASEAN) liu-husi programa Singapore-Timor Leste ASEAN,” Embaixadór ne’e dehan ba jornalista sira iha Palásiu Governu Dili, hafoin hasoru malu ho Primeiru-Ministru Kay Rala Xanana Gusmão, tersa ne’e
Embaixadór Robin Su atualiza katak, Singapura lansa ona programa ne’ebé dezeña espesifikamente atu ajuda Timor-Leste hodi prepara ninia adezaun tomak iha ASEAN tuir roteiru ne’ebé dezenvolve no diskute ona to’o hetan apoiu husi membru Estadu ASEAN tomak.
“Ha’u komprinde Timor-Leste servisu maka’as hodi kumpri kriteria sira ne’e tuir roteiru no atinjimentu ne’ebé dezeña ona, ha’u hein atu kontinua servisu hamutuk ho Governu Timor-Leste. Hodi Singapura nia naran ho ekipa iha programa lubuk ida atu implementa,” Robin Su hateten.
Liu-husi Programa STARS, Singapura konsege implementa formasaun tolu ba ofisiál Timoroan na’in-90 iha tinan 2023 mak hanesan, formasaun iha lian Inglés, área preparasaun no foti nota ba enkontru oioin ASEAN nian inklui formasaun kona-bá abilidade báziku sira ba negosiasaun nian.
Diplomata ne’e kontente tebes bele hasoru-malu ho Primeiru-Ministru tanba konsege diskute asuntu oioin inklui ko’alia kona-bá hafoun relasaun no reafirma kooperasaun bilaterál entre nasaun rua.
Durante enkontru, Embaixadór ne’e mós rona istória Timor-Leste nian, ne’ebé haktuir hosi Xefe Governu liu-liu kona-bá prosesu konstrusaun Estadu RDTL.
PM esplika dezenvolvimentu infraestrutura
Biban ne’e, Xefe Governu esplika prosesu dezenvolvimentu liuliu infrastrurura ba Embaixadór Singapura referidu
“Ha’u kontente tebes tanba bele hasoru nia (PM Xanana). Ida-ne’e maka ha’u nia vizita ba dala haat mai Dili. Ida ne’e mak ha’u nia vizita fulan 18 nu’udar Embaixadór ba ita-boot sira nia nasaun estraordináriu. Iha enkontru ami diskute tópiku oioin, no PM esplika mai ha’u kona-ba dezenvolvimentu Timor-Leste nian,” Embaixadór ne’e hateten ba jornalista sira iha Palásiu Governu Dili, tersa ne’e.
Nia esplika katak, iha enkontru ne’e Primeiru-Ministru fahe istória sira kona-ba istória Timor-Leste nian ne’ebé riku tebes, maski ida ne’e nasaun ne’ebé joven tebes, nia esperiénsia ona agitasaun barak iha nia istória ne’ebé relativamente badak maibé riku.
Tuir nia, dezenvolvimentu infraestrutura atuál iha Timor-Leste nu’udar esforsu atu hasa’e kualidade moris komunidade nian no suporta kreximentu ekonómiku ne’ebé sustentável.
“Ha’u hetan benefísiu maka’as husi konversa ho Primeiru-Ministru PM fahe mós ho ha’u kona-ba oinsá matenek no transparente utilizasaun orsamentu no fundu rikusoin Estadu nian hodi harii projetu infraestrutura sira ba sustentabilidade no bem-estar povu Timor-Leste nian”, nia hatete.
To’o agora, dezenvolvimentu infraestrutura iha Timor-Leste hatudu ona progresu ho foku prinsipál ba hasa’e kapasidade lojístika, konetividade entre rejiaun sira, no dezenvolve setór importante sira hanesan agrikultura no turizmu.
Jornalista: Hortencio Sanchez
Editór : Florencio Miranda Ximenes
