DILI, 06 Agostu 2024 (TATOLI) – Governu Austrália, liuhusi Timor-Leste Police Development Programe (TLPDP) disponibiliza motorizada 24 ba Polísia Nasionál Timor-Leste (PNTL) hodi apoia sira-nia atividade iha terrenu.
Komandante Jerál PNTL, Komisáriu Jerál Polísia, Henrique da Costa, hateten TLPDP entrega motorizada ho marka Honda Beat atu tulun serbisu Polísia Investigasaun, Unidade Apoiu ba Ema Vulneravel (VPU), Forensik no polísia komunitária.
“Ho motorizada ne’ebé TLPDP oferese ne’e bele ajuda seksaun sira atu hala’o sira-nia serbisu ho di’ak liután hodi atende kazu sira, inklui bele foti mós medida ruma ba kazu sira no halo prevensaun ruma bainhira vizita komunidade ne’ebé sai vítima hodi fahe informasaun relasiona ho violénsia doméstika, nune’e sira bele hasees aan”, komandante dehan.
Nia salienta kooperasaun entre PNTL no TLPDP estabelese tinan barak ona, liuliu oinsá atu kontribui ba dezenvolvimentu instituisaun PNTL rasik.
Área sira ne’ebé TLPDP fó tulun maka iha kapasitasaun rekursu umanu, harii infraestrutura no apoia ekipamentu sira. Husi parte infraestrutura nian TLPDP konsege konstrui ona postu sira iha fronteira, nomós edifísiu ba VPU iha munisípiu no apoiu seluk mak veíkulu no kámara vídeo vijilánsia (CCTV, sigla inglés).
“TLPDP mós realiza formasaun lubuk ida ba membru Polísia Nasionál Timor-Leste iha área lideransa nian iha Austrália, inklui formasaun espesializada sira hanesan investigasaun no polisiamentu komunitáriu nian. Ita husu nafatin sira kontinua fó apoiu mai PNTL, nune’e bele lori membru PNTL sira sai polísia profisionál iha area importante sira”, dehan.
Iha Fatin hanesan Komandante TLPDP, Superintendente Polísia, Darren Boyd, dehan motorizada 24 ne’e atu responde ba nesesidade departamentu ka seksaun sira ne’ebé halo serbisu iha parte Investigasaun, Forensik no Polísia Komunitária atu halo atendimentu ba problema públiku nian ne’ebé akontese iha kada munisípiu.
“Apoiu ne’ebé ita kontinua fó ba polísia ne’e validu ba tempu naruk, tanba kooperasun entre TLPDP ho PNTL ne’e la’o kle’ur ona. Ita sempre akompaña atividade ne’ebé ita-nia polísia sira halo”, realsa.
Jornalista: Tomé Amado
Editora: Maria Auxiliadora
