DILI, 07 agostu 2024 (TATOLI) – Xefe Departamentu Medisina Interna, Gustavo do Rosario, husu ba pasiente sira ne’ebé fase raan atu mantein halo tratamentu iha Hospitál Nasional Guido Valadares (HNGV), bainhira Amu Papa vizita Timor-Leste.
“Tuir informasaun ne’ebé mak sai katak Amu Papa mai vizita ita-nia rain sei feriadu, maibé ida-ne’e depende ba nasionál nian, maibé pasiente fase raan kontinua halo tratamentu tanba sira-nia moris depende ba fase raan, se la fase implika ba sira-nia vida”, Gustavo do Rosario, informaba jornalista sira iha HNGV, ohin.
Nia hateten, pasiente sira ne’ebé mak fase raan durante ne’e hela iha Munisípiu Liquiça, Ermera, Dare, Tibar no Hera inklui hela iha Tasi-Tolu, entaun oinsá Governu haree ida-ne’e, atu sira bele kontinua mai HNGV.
“Se ezemplu feriadu loron neen mak transporte la halai hotu, dalan taka hotu, sira fase raan oinsá, tanba ita-nia pasiente balun hela iha Tibar, balun hela Liquiça, Ermera, Dare, Hera no balun hela iha Tasi-Tolu, zona ne’ebe mak uza ba Amu Papa halo misa ba, entaun oinsá Governu bele rezolve ida-ne’e, atu sira bele mai halo tratamentu fase raan nafatin”, nia dehan.
Nia esplika, HNGV prepara ona lista pasiente fase raan nian hamutuk 102 atu enkamiña ba parte relevante atu sira bele mai fase raan no tenke akompaña hosi família sira.
“Parte HNGV prepara hela lista pasiente, tanba ne’e, lista sira, ami enkamiña ona atu nune’e sira mai akompania hosi família hodi asesu mai HNGV maibé ida-ne’e kabe ba Governu tanba dehan labele halo movimentu, maibé sira ne’e halo tratamentu fase raan, se sira la tratamentu fase raan mak implika ba sira-nia vida, tanba nee ita-nia lista sei halo liña koordenasaun entre kargu xefia no polísia tránzitu, nune’e bele fasilita ita-nia maluk sira ne’ebé mak fase raan ne’e”, nia relata.
Nia dehan, pasiente ne’ebé mak fase raan iha HNGV hamutuk 102 ne’ebé mak ho dadus akumuladu tanba sira fase raan semana ida dala-rua, lae semana ida dala-tolu. Pasiente fase raan ne’e feto hamutuk 48 no mane hamutuk 54.
“Dadus ne’e, hahú inisiu fase raan iha 2012 hamutuk ho pasiente foun ho totál 102, ne’ebé afeta ba pasiente idade hosi 35 to’o 40”, nia konklui.
Jornalista : Felicidade Ximenes
Editór : Zezito Silva
