Klibur Domin Tibar halo escrening TBC liu rihun 10 iha Liquiça
DILI, 07 agostu 2024 (TATOLI) – Diretór Ezekutivu Fundasaun Klibur Domin, Joaquim Freitas Soares, hateten Klibur Domin Tibar halo escrening ba tuberkoloze 10.073 iha Munisípiu Liquiça.
“Durante fulan neen, hosi janeiru to’o juñu konsege halo escrening ba komunidade husi Liquiça hamutuk 10.073, hosi ne’e ema ne’ebé mak ita deskonfia ba sinál sintoma tuberkoloze hamutuk 678, depois hosi amostra ne’ebé mak ita rekolla no halo teste kabeen tasak iha 69 mak kazu positivu ba tuberkoloze”, Joaquim Freitas Soares informa via telefone, ohin.
Nia esplika, hosi kazu sira ne’e, ekipa sira tuun direta ba komunidade sira-nia hela fatin hodi tama sai uma, deteta kazu tuberkoloze.
“Sira ne’ebé mak ita deteta pozitivu ne’e, ita lori mai klínika klibur domin hodi halo tratmentu to’o rekopera”, nia informa.
Nia dehan, Klinika Klibur Domin ho Ministériu Saúde asina akordu hodi deteta durante, 2024-2026, iha Munisípiu Liquiça.
“Ami asina akordu ho Ministériu Saúde atu halo deteksaun ba moras tuberkoloze iha Liquiça de’it durante tinan tolu, 2024-2026. Maibé uluk ami servisu iha Munisípiu Viqueque , Baucau Dili-Atauro no Metinaro, tanba hetan apoiu fundu hosi KOICA, agora fundu ne’e remata ona no Ministériu Saúde mós redús ami-nia fundu, entaun ami kobre Liquiça de’it ona. Se ba oin mak iha posibilidade ami bele estende tan programa tuberkoloze ne’e ba Buacau, Viqueque no Atauro maibé ida-ne’e ami sei halo diskusaun ho ministériu, karik sira aloka tan orsamentu ruma mak ami bele hala’o servisu ida-ne’e”, nia hateten.
Nia relata, orsamentu ne’ebé mak aloka durante 2024-2026, husi ministériu fó ba Klibur Domin hamutuk liu rihun $296 ne’ebé mak atu finansia programa tuberkoloze.
Jornalista : Felicidade Ximenes
Editór : Zezito Silva
