DILI, 07 agostu 2024 (TATOLI) – Membru Falintil-Forsa Defeza Timor-Leste hamutuk 25 halo doasaun raan hodi komemora aniversáriu FALINTIL) ba dala-49.
Membru hirak ne’e mai husi Kuartel Jenerál F-FDTL ho totál 20 no Sentru Formasaun Treinamentu Komandante Nicolau Lobato Metinaro na’in-lima.
Xefe Estadu Maiór F-FDTL, Brigadeiro Jenerál, José da Costa ‘Trix’, dehan loron FALINTIL ne’ebé monu iha 20 agostu no prosede iha Kuartel Jerál F-FDTL. selebrasaun ne’e, iha atividade rua importante mak futsal no doasaun raan.
“Eventu jogu Futsal mak ita realiza ona no lao hela. Ohin ita realiza tán atividade doasaun raan. Atividade ida-ne’e importante tebes ba instituisaun FALITIL-FDTL, tanba uluk FALINTIL fó sira-nia isin no raan ba libertasaun pátria no povu, agora ita fó-nia raan hodi salva ema seluk nia vida”, Trix hateten ba jornalista sira iha ámbitu abertura ba atividade doasaun raan ne’ebé Komandu F-FDTL halo iha salaun auditoria Kurtel Jerál F-FDTL, Fatuhada, kuarta, ohin.
Nia esplika, ema nia raan turuk ida bele salva ema nia vida, ida-ne’e los tanba ne’e komandu foti inisiativa hodi realiza atividade doasaun raan ne’e.
“Tanba ne’e, ohin ita realiza atividade doasaun raan atu membru F-FDTL sira bele kontribui sira-nia raan hodi ba tau iha ospitál, karik iha ita-nia maluk balun ne’ebé presiza raan karik doutór bele fó”, nia afirma.
Trix mós fó obrigadu ba ekipa departamentu saúde husi Komandu F-FDTL ne’ebé koordena ho Ospitál Nasional Guidu Valadares hodi realiza atividade doasaun raan iha Kuartel Jenerál F-FDTL.
Nia dehan, komemorasaun ida-ne’e, sei prosede iha Kuartel Jenerál F-FDTL, Fatuhada.
Tema ba selebrasaun ne’e mak“ Tempu Reflesaun no Tempu ba Mudansa”, konklui
Jornalista : Natalino Costa
Editór : Zezito Silva
