VIQUEQUE, 07 agostu 2024 (TATOLI)-Prezidente Autoridade Munisípiu (PAM) Viqueque, Francisco C.S de Gonzaga Soares, husu Apoiu Lideransa Monitória no Apredizajen (Alma) halo monitorizasaun no akompañamentu líder eskola sira iha munisípiu Viqueque hodi hadi’a kualidade eskola.
“Ha’u sente programa ALMA ne’e di’ak no kontinua prezensa iha eskola sira. Nu’udar autoridade, ha’u hakarak pesoál ALMA sira nafatin bá akompaña hodi halo mentór no formasaun ba líder eskola sira hodi hadi’a kualidade ensinu eskolár,” Francisco C.S de Gonzaga Soares, hateten ba Agência TATOLI, hafoin ramata sorumutu ho grupu ALMA Viqueque, iha salaun administrasaun, ohin.
PAM Viqueque ne’e dehan, ALMA sai hanesan espirítu ida hodi akompaña no fó mentór ba profisionál edukasaun sira.
“Tanba ita simu Teoria fasil, maibé ita implementa difísil. Nune’e, ha’u espera prezensa ALMA iha Viqueque ita bele servisu hamutuk ho serbisu edukasaun hodi haree ita-nia oan sira. Ha’u husu saida maka ALMA hetan iha eskola sira tenke relata ba nasionál hodi tau ba atensaun,” Autoridade ne’e hato’o.
Iha fatin hanesan, Diretór Servisu Edukasaun Munisípiu Viqueque, Julio Sakadura, haktuir, durante ne’e ALMA halo servisu mentorin ba atividade eskola sira iha munisípiu Viqueque, oinsá maka jere eskola la’o di’ak.
“Prezensa ALMA iha Viqueque ha’u sente di’ak tanba halo avaliasaun ba ita-nia eskola hotu-hotu. Tanba tempu profesór sira tama aula sira-nia prezensa mós iha ona eskola hodi akompaña iha aula-laran, akompaña kurríkulu sira-ne’ebé manorin sira lori,” nia tenik.
Iha biban ne’e Koordenadór ALMA ba munisípiu Viqueque, Anibal da Costa, hateten, ALMA husi Ministériu Edukasaun (ME) apoia husi Governu Austrália liuhusi Parseira Dezenvolvimentu Umanu (PDH, sigla inglés), estabelese iha tinan-2015 no tama iha munisípiu Viqueque iha 2017, ho objetivu atu apoia implementasaun ba planu estratéjiku Edukasaun Nasionál no kompleta implementasaun kurríkulu nasionál baze liuhusi lideransa eskola sira hanesan diretór, adjuntu, koodernadór no manorin, feto potensiál, hodi asegura kontinuasaun dezenvolvimentu profesionál iha munisípiu, agrupamentu, no nível eskola.
“Atividade monitór ba eskola sira-ne’ebé ami halo maka hanesan, Governu nasionál iha estratéjia, polítika, sistema no desizaun ne’ebé bele hadi’a kualidade hanorin ba estudante sira. Iha mós sistema edukasaun no kapasidade fasilita di’ak liután kualidade hanorin ba estudante sira. Eskola iha lideransa, rekursu no forsa serbisu atu fornese hanorin ne’ebé ho kualidade di’ak ba estudantu sira,” nia esplika.
Daudaun ne’e, tuir koordenadór, ekipa ALMA iha munisípiu Viqueque hamutuk na’in-11 hodi tau matan ba primeiru ano no segundu ano husi Ensinu Báziku Sentrál (EBC, sigla portugés) hamutuk 18 no Ensinu Báziku Filiál (EBF) hamutuk 75 iha eziste iha Viqueque.
Entretantu, sorumutu entre ekipa ALMA ho PAM ne’e hetan akompañamentu husi diretór servisu Edukasaun no superintendente sira no xefe departamentu eduksaun Viqueque.
Jornalista: Vitorino Lopes da Costa
Editór : Rafael Ximenes de A. Belo
