DILI, 07 agostu (TATOLI)—Prezidente Komisaun B trata asuntu Negósiu Estranjeiru no Defeza ho Seguransa iha Parlamentu Nasionál (PN), Augusto Domingos “Deker”, kontinua husu Polísia Nasionál Timor-Leste (PNTL) atu fó seguransa másimu iha vizita Amu Papa Francisco mai Timor-Leste.
Notísia Relevante: Infografia: Vatikanu lansa ona oráriu Papa Francisco hala’o vizita pastorál iha Timor-Leste
“Husu ba Komandu PNTL atu mantein orden, hodi labele fó espasu ba kriminozu sira kria instabilidade iha komunidade nia leet, tanba ita agora prepara hela ba vizita Sua Santidade nian,” Nia hato’o iha uma fikum Parlamentu Nasionál.
Enkuantu, foin lala’is komisaun B hala’o vizita ba komandu Jerál PNTL hodi hatene besik liután preparasaun Komandu nian hodi asegura seguransa ba Papa Francisco hala’o vizita Estadu no pastorál iha Timor-Leste.
Enkuantu FALENTIL Forsa Defeza Timor-Leste (F-FDTL) no Polísia Nasionál Timor-Leste (PNTL) formaliza ona akordu operasaun konjunta ho naran “Pombu Mutin” hodi garante seguransa ba vizita Amu Papa Francisco iha país, entre loron 09 no 11 Setembru 2024.
Jornalista : Nelson de Sousa
Editór : Cancio Ximenes
