PSIK identifika feto ida ne’ebé komete krime infantisida iha Beduku
DILI, 07 Agostu 2024 (TATOLI) – Polísia Sientífika no Investigasaun Kriminál (PSIK) identifika feto ida ho inisiál T.S, tinan 28, ne’ebé komete krime infantisida ne’ebé akontese iha Beduku, Tali-Laran, Dili, iha loron 01 Agostu.
Portavós PSIK, Inspetór-Xefe Mário Tavares, informa katak ekipa PSIK asegura ona suspeitu T.S hodi halo prosesu identifikasaun porfunda atu hatene nia envolvimentu iha krime ne’e.
Lembra katak, iha 03 Agostu, ekipa PSIK simu informasaun husi komunidade iha área Beduku katak iha bebé ida foin moris ne’ebé ema so’e, maibé ho kondisaun mate. Ekipa PSIK tun kedan bá terrenu hodi halo ezame iha fatin akontesimentu ne’e.
“Bebé ne’ebé mate ne’e ho kondisaun fízika la kompletu. Nia hirus-matan sa’e ba to’o ulun laiha ona. Iha indikasaun katak animál mak han ona, hela de’it nia isin parte kabun mai to’o ain mak sei iha”, Mário Tavares adianta.
Nia esplika katak depoizde PSIK halo tiha ezame bá fatin akontesimentu, ekipa transporta kedan bebé bá Ospitál Nasionál Guido Valadares hodi submete ba prosesu autópsia.
PSIK esforsu hodi halo identifikasaun ba suspeitu ka inan ne’ebé halo ona hahalok krime ne’e no iha loron 06 Agostu hetan duni suspeitu feto ida ho inisial T.S nu’udar inan ba bebé ne’e.
Suspeitu ne’e daudaun submete ona ba prosesu ezame médiku iha Ospitál Nasionál Guido Valadares hodi haree nia kondisaun saúde relasiona ho kazu so’e bebé.
Tuir diretór PSIK, nia parte seidauk bele divulga informasaun kle’an, tanba prosesu identifikasaun sei la’o hela, maibé asuntu esensiál liu maka depoizde akontesimentu kazu so’e bebé ne’e, ekipa konsege halo identifikasaun.
Nia dehan maske deskonfia T.S mak inan ba bebé ne’ebé mate ona, maibé hanesan umanu suspeitu mós presiza hetan tratamentu saúde tanba depois nia partu dalaruma seidauk hetan tratamentu ida di’ak ba nia saúde.
Husi prosesu identifikasaun ne’e, parte PSIK sei relata ba Ministériu Públiku atu foti desizaun ruma ba kazu ne’e, tanba infantisida ne’e konsidera krime partikulár. Krime ne’e bele imputa ba inan sira ne’ebé bainhira partu ou depoizde partu halakon oan nia vida.
“Husi kazu infantisida ne’e kuandu haree ba Kódigu Penál bele kondena suspeitu sira entre tinan 3 to’o 10. Nune’e, husi dadus ne’ebé PSIK iha, kazu infantisida ne’e foin mak rejista dahuluk iha lista PSIK nian”, informa.
Jornalista: Tomé Amado
Editora: Maria Auxiliadora
